Innlent

Hreindýr liggja dauð sem hráviði í Suðursveit

Jakob Bjarnar skrifar
Hreindýrin leita niður á láglendið í kuldanum sem verið hefur uppá síðkastið. Hér getur að líta tarf sem fest hefur horn sín í girðingu.
Hreindýrin leita niður á láglendið í kuldanum sem verið hefur uppá síðkastið. Hér getur að líta tarf sem fest hefur horn sín í girðingu. sigurður guðjónsson

Vísir heyrði í leiðsögumanni nú rétt í þessu, þar sem hann var á leið um Suðursveit, og sagði hann heldur ókræsilega sýn blasa við þeim sem þar fara um.

„Hér liggja hér hreindýr víða í vegakantinum, dýr sem búið er að keyra niður, og það gerir enginn neitt í þessu. Hrafnar eru yfir dýrunum, að kroppa úr þeim augun,“ sagði fararstjórinn og honum blöskraði. „Þetta er ógeðslegt.“

Maðurinn sagðist hafa keyrt fram á fjögur dauð hreindýr á leiðinni milli Hafnar og Jökulsárlóns. Hann segir þau liggja eins og hráviði á þessu svæði, útum allt. Dýrin safnast víða saman við þjóðveginn í kuldanum og skapa hættu; ýmsir virðast hafa lent í því að aka þau niður.

„Ég heyrði í einum sem hafði keyrt fram á dýr sem lá útí vegakanti og engdist eftir að einhver hafði keyrt á það. Hann fór og skar það á háls, til að linna þjáningar dýrsins. Þetta er ótrúlegt að horfa uppá.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira