Erlent

Rússar segja ásakanirnar tilhæfulausan áróður

Atli Ísleifsson skrifar
Rússnesk Su-34 herþota.
Rússnesk Su-34 herþota. Vísir/AFP

Rússneska varnarmálaráðuneytið hefur hafnað ásökunum um að rússnesk orrustuþota hafi rofið tyrkneska lofthelgi og segir að um áróður sé að ræða.

Mikil spenna er í samskipum Tyrklands og Rússlands eftir að Tyrklandsher skaut niður rússneska herþotu nærri landamærunum Sýrlands og Tyrklands í nóvember.

Igor Konashenkov, talsmaður rússneska varnarmálaráðuneytisins, segir að rússneskar herþotur sem staðsettar séu í Sýrlandi hafi aldrei rofið tyrkneska lofthelgi. „Yfirlýsingar Tyrkja um meint rof rússneskra Su-34 á lofthelgi er ekkert annað en tilhæfulaus áróður.“

Tyrkir vilja meina að nýjasta atvikið hafi átt sér stað í gær og var sendiherra Rússlands í tyrknesku höfuðborginni Ankara boðaður á fund í tyrkneska utanríkisráðuneytinu.

Recep Tayyip Erdogan Tyrklandsforseti segir að Rússar verði að verða reiðubúnir undir afleiðingar, haldi þeir brotunum áfram.

Jens Stoltenberg, framkvæmdastjóri NATO, hvatti í dag Rússa til að haga sér með ábyrgum hætti og virða lofthelgi NATO.


Tengdar fréttir

Rússnesk herþota rauf lofthelgi Tyrklands

Rússnesk herþota rauf lofthelgi Tyrklands í gær en mikil spenna er í samskiptum ríkjanna eftir að Tyrkir skutu niður rússneska herþotu í nóvember.



Fleiri fréttir

Sjá meira