Körfubolti

Dempsey kominn aftur á Krókinn | Jerome Hill leystur undan samningi

Kristinn Páll Teitsson skrifar
Dempsey, hér til hægri, hleypur aftur í vörn.
Dempsey, hér til hægri, hleypur aftur í vörn. Vísir/Auðunn

Körfuknattleiksdeild Tindastóls sendi frá sér tilkynningu í dag þar sem tilkynnt var að Myron Dempsey væri á leið til landsins og hann myndi taka slaginn með Tindastól seinni hluta tímabilsins.

Jafnframt var það tekið fram að Jerome Hill væri farinn frá félaginu.

Dempsey sem lék með Tindastól á síðasta tímabili snýr því aftur á Krókinn en með hann innanborðs komst liðið alla leiðina í úrslitaleik Íslandsmótsins þar sem liðið þurfti að sætta sig við tap gegn KR.

Dempsey sem er 25 ára gamall miðherji lék 30 leiki fyrir Tindastól á síðasta tímabili en hann var með 20,8 stig, 10,2 frákast og 1,7 stoðsendingu og lék 28 mínútur að meðaltali í leik.

Í tilkynningunni þakkar körfuknattleiksdeildin Jerome Hill fyrir sitt framlag en hann var með 17,6 stig að meðaltali í leik ásamt því að taka 10,7 frákast í þeim 13 leikjum sem hann lék fyrir Tindastól.

Kemur fram að Dempsey sé væntanlegur til landsins eftir helgi og gæti því leikið fyrsta leik sinn gegn Njarðvík í Síkinu á fimmtudaginn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira