Innlent

Ríkið bótaskylt ef dæmt er gegn EES-rétti

Óli Kristján Ármannsson skrifar
ESA segir ríkið brotlegt við EES-samninginn með því að hafa ekki klausur í lögum um skaðabótaábyrgð ríkisins gangi íslenskir dómstólar gegn lagaframkvæmd EES.
ESA segir ríkið brotlegt við EES-samninginn með því að hafa ekki klausur í lögum um skaðabótaábyrgð ríkisins gangi íslenskir dómstólar gegn lagaframkvæmd EES. Fréttablaðið/GVA

Íslensk lög koma í veg fyrir að einstaklingar geti höfðað skaðabótamál gegn ríkinu þegar dómstólar fara ekki að EES-rétti. Þetta kemur fram í rökstuddu áliti ESA, eftirlitsstofnunar EFTA, í gær. Er þess krafist að Ísland fylgi meginreglunni um skaðabótaábyrgð ríkis vegna brota á reglum EES-réttar, en sú meginregla taki einnig til brota dómstóla.

Fram kemur í tilkynningu ESA að eftirlitsstofnunin hafi komist að þessari niðurstöðu eftir rannsókn í tilefni kvörtunar frá aðila sem taldi sig hafa orðið fyrir tjóni vegna rangrar túlkunar Hæstaréttar á EES-rétti.

„Þótt ríki geti borið skaðabótaábyrgð vegna dóma sem brjóta gegn reglum EES-réttar er sjálfstæði dómstóla ekki dregið í efa í niðurstöðu ESA. Hitt er heldur ekki dregið í efa að dómar eru endanlegir. Meginreglan um skaðabótaábyrgð ríkis krefst þess að bætur séu greiddar en ekki endurskoðunar á niðurstöðu dómsins,“ segir í tilkynningu ESA.

Rökstutt álit er annað skrefið í meðferð samningsbrotamáls. „Hafi íslensk stjórnvöld ekki brugðist við rökstudda álitinu með nauðsynlegum aðgerðum innan tveggja mánaða getur ESA vísað málinu til EFTA-dómstólsins.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira