Innlent

Sátu dýrar jólaveislur í boði ríkisins en aðrir starfsmenn fengu ekkert

Garðar Örn Úlfarsson skrifar
Á meðan sumar ríkisstofnanir gáfu starfsmönnum sínum engan jólamat sátu aðrir að hlaðborðum veitingastaðanna með mökum sínum á kostnað ríkisins.
Á meðan sumar ríkisstofnanir gáfu starfsmönnum sínum engan jólamat sátu aðrir að hlaðborðum veitingastaðanna með mökum sínum á kostnað ríkisins. Mynd/Getty
Eftirlits- og rannsóknarstofnunin Matís gaf starfsmönnum sínum veglegustu gjöfina um nýliðin jól af öllum stofnunum og embættum ríkisins. Hljóðbókasafnið hélt dýrustu jólaveisluna.

Fréttablaðið sendi spurningar um jólahlaðborð og jólagjafir til stofnana, embætta og fyrirtækja í eigu ríkisins og hafði fengið ríflega 140 svör áður en gengið var frá þessari grein í gær. Ekki bárust svör frá öllum.



Matísfólk fékk ríflega 30 þúsund króna gjöf

Engar sérstakar reglur eru um jólagjafir og hátíðarveislur hjá ríkinu. Það virðist endurspeglast ágætlega í svörunum sem Fréttablaðinu bárust því á meðan sumir ríkisstarfsmenn fengu jafnvel hvorki gjöf né veisluboð fengu aðrir tugþúsunda gjafir og tóku þátt í dýrum veislum.

Efstir á listanum yfir verðmæti jólagjafa eru 132 starfsmenn Matís. Þeir fengu hver og einn 25 þúsund króna inneignarkort í banka og forrétta­pakka frá Trít ehf. að andvirði 5.827 krónur. Samanlagt verðmæti þessara tveggja gjafa er 30.827 krónur. Matís bauð starfsmönnum hins vegar ekki til jólasamsætis.

Næstir á eftir Matís á jólagjafalistanum eru starfsmenn Einkaleyfa­stofu. Verðmæti jólapakkans þeirra var 27.800 krónur. Í pakkanum var púði, kerti og leikhúsmiðar. Einkaleyfastofa greiddi síðan 5.782 krónur á mann í jólahlaðborð sem haldið var í stofnuninni sjálfri.

Varðandi verðmæti jólagjafanna er rétt að taka fram að á nokkrum stöðum var jólagjöfin í formi eins eða fleiri frídaga. Þannig fengu starfsmenn Náttúrufræðistofnunar og Þjóðminjasafns, fyrir utan þjóðminjavörð og fjármálastjóra, frí milli jóla og nýárs í jólagjöf. Ekki var lagt mat á verðmæti þessara gjafafrídaga í svörum til Fréttablaðsins.

Stórveisla Hljóðbókasafnsins í Perlunni

Sem fyrr segir voru það starfsmenn Hljóðbókasafns sem sátu dýrustu jólaveisluna. Þeim var boðið í Perluna ásamt mökum og hljóðaði reikningurinn upp á 17.335 krónur á hvern gest sem voru fimmtán. Fyrir þá starfsmenn sem komu með maka má segja að Hljóðbókasafnið hafi greitt 34.670 krónur. Í svari stofnunarinnar kemur á hinn bóginn fram að starfsmenn fengu ekki jólagjöf.

Næst á eftir á þessum lista er Jafnréttisstofa sem bauð starfsmönnum og mökum þeirra, samtals ellefu manns, í veislu á Icelandair hótelinu á Akureyri. Þegar upp var staðið var reikningurinn þar 16.527 krónur á mann. Starfsmenn Jafnréttisstofu fengu jafnframt 8.500 króna gjafabréf í Menningarhúsið Hof í jólagjöf. Hafi starfsmaður farið með maka í jólaveislunna hefur Jafnréttisstofa greitt 41.544 krónur fyrir hann í veisluhöld og gjafir í desember.

Þeir sem fengu ekkert

Meðal þeirra sem hvorki fengu gjafir eða jólaboð eru starfsmenn Fjölbrautaskólans við Ármúla, Bankasýslunnar, Sýslumannsins á Norðurlandi vestra og Vatnajökuls­þjóðgarðs.

Þá má nefna að algengt er að starfsmannafélög standi fyrir jólafagnaði og borgi hann að öllu leyti eða á móti starfsmönnunum eða viðkomandi stofnun. Algengar jólagjafir eru matarkörfur, ostabakkar, konfekt og gjafakort.

Landspítalinn keypti tíu þúsund leikhúsmiða

Af stórum vinnustöðum má geta Landspítalans þar sem keypt voru fimm þúsund gjafakort á tvo miða hvert í Borgarleikhúsið. Fyrir það greiddi spítalinn alls 15 milljónir króna eða 3.000 krónur fyrir hvern starfsmann. Landspítalinn hélt síðdegismóttöku fyrir starfsmenn í Hörpunni og greiddi fyrir það ríflega 8,1 milljóna króna sem svarar til um 7.400 króna á hvern hinna 1.100 starfsmanna sem áætlað er að hafi að lágmarki sótt jólahófið.

Engar reglur um jólagjafir ríkisins

Reglur um jólagjafir og jólahlaðborð hjá ríkinu eru ekki til sem slíkar. „Ríkisendurskoðun hefur ávallt lagt áherslu á að stofnanir gæti hófs í risnu og gjöfum til starfsmanna,“ segir hins vegar í svari Ríkisendurskoðunar við fyrirspurn Fréttablaðsins.

Ríkisendurskoðun bendir jafnframt á að í gildi séu Reglur um notkun almannafjár til tækifærisgjafa frá árinu 1985. Í þeim segir að óheimilt sé að verja fé ríkisins til tækifærisgjafa nema í tengslum við opinberar og óopinberar heimsóknir annars vegar og hins vegar í sérstökum tilfellum sem viðurkenningu fyrir gott starf í þágu ríkisins.

Varðandi jólahlaðborð og slíkar veislur má líta til reglna fjármálaráðuneytisins um risnuhald hjá ríkisstofnunum. „Með risnu er átt við kostnað sem stofnun eða embætti veitir í þeim tilgangi að sýna þeim er risnunnar nýtur gestrisni, þakklæti eða viðurkenningu,“ segir þar í 1. grein. „Fullnægjandi tilefni skal ávallt vera til þess að risna sé veitt,“ segir síðan áfram í 2. grein.

Vísir/Ingólfur

Tengdar fréttir




Fleiri fréttir

Sjá meira


×