Innlent

Nýtt fyrirkomulag í gufunni í Vesturbæjarlaug ótengt kynferðislegri áreitni

Kolbeinn Tumi Daðason skrifar
Hafliði Halldórsson forstöðumaður segir að kynferðisleg áreitni sé sem betur fer ekki daglegt brauð í Vesturbæjarlaug.
Hafliði Halldórsson forstöðumaður segir að kynferðisleg áreitni sé sem betur fer ekki daglegt brauð í Vesturbæjarlaug. Vísir/GVA
Sú breyting varð samhliða hækkun verðskrár í sundlaugunum á höfuðborgarsvæðinu að aðgengi að gufubaði karla og kvenna, sánu, í Vesturbæjarlauginni og Breiðholtslaug var gert opið öllum. Fram til þess tíma þurfti að greiða sérstaklega fyrir aðgang að gufuböðunum og fékk fólk lykil til að komast í gufuna.

Hafliði Halldórsson, forstöðumaður Vesturbæjarlaugar, segir að sú einkennilega staða hafi komið upp eftir að ákveðið var að hækka aðgangseyrin í sundlaugarnar að dýrara var orðið að fara í sund en að fá aðgang að gufubaðinu. Þess utan var sala á kortum í gufuna ekki mikil. Áfram verður átján ára aldurstakmark í gufubaðið að sögn Hafliða.

Vesturbæjarlaug er ein af vinsælustu laugum landsins. Nýr og stór pottur hefur vafalítið töluvert um það að segja.Vísir/GVA
Dómur fyrir áreiti í sánunni

Fréttablaðið greindi frá því í nóvember
 að á síðasta ári hefði fallið dómur þar sem karlmaður fékk 30 daga skilorðsbundið fangelsi fyrir kynferðislega áreitni í gufubaði karla í Vesturbæjarlauginni. Við það tilefni sagði Hafliði vissulega dæmi þess að undanfarin ár að kvartað hafi verið vegna kynferðislegrar áreitni.

Sjá einnig:Hollywood-stjarna í gufunni í Vesturbæjarlaug

Tengdu sumir gesta Vesturbæjarlaugar nýtt fyrirkomulag í gufubaðinu innandyra við fréttir af áreitni í gufunni. Dómurinn kom ekki sem þruma úr heiðskíru lofti enda lengi verið sögusagnir um að ýmislegt hafi viðgengist í gufubaði karl, annað en að þar sitji karlar og slaki á.

Það mun hins vegar ekki vera tilfellið enda nýja fyrirkomulagið aðeins tengt nýlegum verðskrárhækkunum að sögn Hafliða.

Eiríkur Örn Norðdahl.
Vilja komast naktir í gufuna

Athygli vakti í fyrradag þegar tíu manna hópur með Eirík Örn Norðdahl í broddi fylkingar birti opið bréf til bæjaryfirvalda á Ísafirði þar sem farið var fram á hætta væri að krefjast þess að sundlaugagestir klæddust sundfötum í gufubaðinu. 

Brot úr bréfinu, sem fær eflaust marga lesendur til þess að brosa út í annað, fylgir að neðan.

Samkvæmt öllum rannsóknum þar að lútandi er gríðarmikill sóðaskapur fylgjandi skítugum, klórböðuðum sundfötum – sem sjúga í sig bakteríur, safna óhreinindum og fóstra vel, þar til að í hitann er komið og viðbjóðurinn uppleysist og vanhelgar löylyna, vit manna, líkama þeirra og sálir, svo þeir fara krankir og hugsjúkir aftur út í veröldina, en ekki tápgóðir og upplitsdjarfir eins og stefnt var til.

Víðast hvar í hinum siðmenntaða heimi er því lagt blátt bann við því að sundföt séu dregin með inn í helgidóminn. Áhöld eru síðan um það hvort hreinlegra sé að sitja á handklæði – og þá tandurhreinu slíku – eða einfaldlega á rassinum, sem er ekki nærri jafn hættulegur og margir halda, sérstaklega ekki þegar maður kemur beint úr áðurnefndu sturtubaði. Ekki verður tekin afstaða í þeirri deilu hér, eða farið nánar út í þá sálma, heldur látið duga að benda þeim á valmöguleikann sem þola ómögulega tilhugsunina um að skilja eftir sig rassafar á bekknum.

Sjö Finnar eru meðal þeirra sem kvitta undir bréfið sem má lesa í heild sinni á vef Bæjarins besta.



Sundhöllin á Ísafirði var teiknuð af Guðjóni Samúelssyni.
Fólkið oftar nakið í Vesturbæjarlauginni

Aðspurður segir Hafliði engar reglur varðandi það hvort fólki fari nakið eða klætt sundfötum í gufubaðið í Vesturbæjarlauginni.

Sjá einnig:Vesturbæjarlaugin besta laug landsins

„Ég held að fólk sé oftast nakið,“ segir Hafliði og minnir á að um tvö gufuböð sé að ræða.

Annars vegar fyrir karla og hins vegar fyrir konur. Þá er einnig gufubað utandyra þar sem kynin koma saman.


Tengdar fréttir

Sundferðin kostar 1.084 krónur

Þrátt fyrir verulega hækkun á stakri sundferð í Reykjavík er raunkostnaður hverrar sundferðar þó áfram hærri.

Vinir Dóra í jólaskapi

Vinir Dóra heitir hlaupahópur undir stjórn Halldórs Bergmann sem hefur verið starfræktur í 17 ár.

Kynferðisleg áreitni í Vesturbæjarlaug

Karlmenn hafa verið áreittir í gufubaði Vesturbæjarlaugar. Forstöðumaður segir engar heimildir vera til að vísa fólki frá ótímabundið. Hvetur fólk til að kæra.




Fleiri fréttir

Sjá meira


×