Erlent

Óeirðir á Haítí: Síðari umferð forsetakosninganna frestað

Atli Ísleifsson skrifar
Andstæðingar forsetans hafa sakað hann um kosningasvindl.
Andstæðingar forsetans hafa sakað hann um kosningasvindl. Vísir/AFP

Kjörstjórn á Haítí hefur frestað seinni umferð forsetakosninganna í landinu sem áttu að fara fram á sunnudag. Öryggissjónarmið eru sögð liggja að baki ákvörðuninni.

Formaður kjörstjórnar, Pierre-Louis Opon, segir að síðustu daga hafi ítrekað verið ráðist á fulltrúa kjörstjórnar, auk þess að kveikt hafi verið í fjölda kjörstaða og þeir brunnið til grunna.

Tugþúsundir hafa mótmælt á götum höfuðborgarinnar Port-au-Prince í vikunni og hafa fulltrúar alþjóðlegs kosningaeftirlits lýst yfir miklum áhyggjum af hinu pólitíska ástandi í landinu.

Síðast á fimmtudaginn hafnaði fráfarandi forsetinn Michel Martelly beiðni stjórnarandstöðunnar um að fresta síðari umferð forsetakosninganna.

Stjórnarskrá landsins kemur í veg fyrir að Martelly geti boðið sig fram að nýju, en þess í stað hefur hann lýst yfir stuðningi við Jovenel Moise sem hlaut flest atkvæði í fyrri umferð kosninganna í október.

Andstæðingar forsetans hafa sakað hann um kosningasvindl og sagði Jude Celestin, sem hlaut næstflest atkvæði í fyrri umferð kosninganna, að hann hugðist ekki taka þátt í síðari umferðinni og lýsti kosningunum sem „farsa“.

Kjörtímabil Martelly er á enda eftir þrjár vikur.

Vísir/AFP


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira