Enski boltinn

Austin hetja Southampton á Old Trafford | Sjáðu markið

Ingvi Þór Sæmundsson skrifar

Charlie Austin tryggði Southampton stigin þrjú gegn Manchester United á Old Trafford í ensku úrvalsdeildinni í dag. Lokatölur 0-1, Southampton í vil.

Markið má sjá í spilaranum hér að ofan.

Þetta var þriðji sigur Dýrlinganna í röð en þeir eru komnir upp í 8. sæti deildarinnar.

United er hins vegar í 5. sætinu með 37 stig, fimm stigum á eftir Tottenham sem er í því fjórða.

Leikurinn var afskaplega rólegur og tíðindalítill og staðan í hálfleik var markalaus eins og hún hefur verið í 10 af síðustu 11 leikjum á Old Trafford.

Liðin virtust ætla að skipta stigunum með sér en á 87. mínútu braut varamaðurinn Adnan Januzaj klaufalega á Austin við hornfánann. James Ward-Prowse tók spyrnuna og sendi beint á kollinn á Austin sem skallaði boltann í netið í sínum fyrsta leik fyrir Southampton eftir vistaskiptin frá QPR á dögunum.

Fleiri urðu mörkin ekki og 0-1 sigur Southampton staðreynd.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira