Körfubolti

Komast Þórsarar í fyrsta sinn í Höllina?

Ingvi Þór Sæmundsson skrifar
Vance Hall hefur leikið vel með Þór í vetur.
Vance Hall hefur leikið vel með Þór í vetur. vísir/ernir

Undanúrslit Powerade-bikars karla í körfubolta fara fram í kvöld en þar mætast annars vegar Þór Þorlákshöfn og Keflavík og hins vegar Grindavík og KR.

Það er talsverður munur á bikarreynslu þessara félaga. KR, Keflavík og Grindavík hafa verið fastagestir í Laugardalshöllinni undanfarna áratugi og unnið bikarmeistaratitilinn samtals 21 sinni.

Þórsarar búa ekki yfir sömu bikarreynslu en þeir hafa aldrei komist í bikarúrslit. Þór hefur raunar aðeins einu sinni áður verið í þessari stöðu, að eiga möguleika á að komast í bikarúrslit. Það var fyrir tveimur árum þegar Þórsarar mættu Grindvíkingum í undanúrslitunum og biðu lægri hlut, 93-84.

Þórsarar unnu sterkan sigur á Haukum, 79-74, í átta-liða úrslitunum en þeirra bíður erfitt verkefni í kvöld gegn toppliði Domino's deildarinnar. Keflavík varð síðast bikarmeistari árið 2012 en það er síðasti stóri titillinn sem þjálfari liðsins, Sigurður Ingimundarson, vann. Kollegi hans hjá Þór, Einar Árni Jóhannsson, hefur einu sinni hrósað sigri í bikarkeppninni, árið 2005 þegar hann þjálfaði Njarðvík.

Grindavík og KR þekkja það ágætlega að mætast í undanúrslitum bikarkeppninnar en þau  mættust einnig á þessum tímapunkti í keppninni árin 1991, 1997 og 2009. Sigur á Grindavík hefur þó ekki verið ávísun á bikarmeistaratitil hjá KR. Vesturbæingar urðu bikarmeistarar 1991 eftir sigur á Grindavík í undanúrslitunum en töpuðu í bikarúrslitum 1997 og 2009.

Gengi Grindvíkinga í vetur hefur ekki verið gott en þeir eru samt sem áður aðeins tveimur sigrum frá bikarmeistaratitlinum sem liðið hefur unnið fimm sinnum áður.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira