Innlent

Aðalmeðferð yfir Annþóri og Berki

Aðalsteinn Kjartansson skrifar
Mynd sem teiknari Fréttablaðsins teiknaði við meðferð annars máls þar sem þeir Annþór og Börkur sættu ákæru.
Mynd sem teiknari Fréttablaðsins teiknaði við meðferð annars máls þar sem þeir Annþór og Börkur sættu ákæru. Vísir/Halldór Baldursson

Aðalmeðferð í máli ríkisins gegn Annþóri Kristjáni Karlssyni og Berki Birgissyni hófst í dag. Eru þeir ákærðir fyrir stórfellda líkamsárás sem varð til þess að samfangi þeirra lét lífið í klefa sínum á Litla-Hrauni. Þeim er gefið að sök að hafa ráðist á manninn, Sigurð Hólm Sigurðsson, í maí árið 2012, með þeim afleiðingum að milta hans rofnaði. Báðir hafa staðfastlega neitað sök í málinu.

Engar upptökur eru til af atvikinu þar sem ekki eru eftirlitsmyndavélar í klefum fanga. Hins vegar eru til upptökur af því að Annþór og Börkur fóru inn klefa Sigurðar Hólm stuttu áður en hann kallaði til fangavarða, þá í andnauð. Beindist grunur að þeim Annþóri og Berki í kjölfar þess að það kom í ljós og voru þeir settir í einangrun. 

Rannsókn málsins tók um ár og kom málið fyrst á borð ríkissaksóknara vorið 2013. Málið var svo þingfest í Héraðsdómi Suðurlands um sumarið sama ár. Síðan þá hefur verið tekist á um álit sérfræðinga en dómurinn féllst á það árið 2014 að fá álit tveggja erlendra sérfræðinga á mati réttarmeinafræðings á krufningarskýrslu í málinu. Þá var samþykkt að fá matsgerð tveggja sálfræðinga.

Þessir sérfræðinga eru ekki sammála um hvort hafið sé yfir vafa að líkamsárás hafi dregið manninn til dauða.

Annþór og Börkur eiga sér báðir langan sakaferil. Þegar hin meinta líkamsárás átti sér stað voru þeir að afplána eftirstöðvar gamalla dóma sem þeir hlutu fyrir manndrápstilraun annars vegar og fíkniefnainnflutning hins vegar. 

Vísir mun fylgjast með aðalmeðferð málsins sem búist er við að taki tvo daga.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×