Fótbolti

Atletico Madrid hélt hreinu í tólfta skipti og skaust á toppinn

Anton Ingi Leifsson skrifar
Yannick Ferreira-Carrasco fagnar marki sínu í kvöld.
Yannick Ferreira-Carrasco fagnar marki sínu í kvöld. vísir/afp

Atletico Madrid er komið á topp spænsku úrvalsdeildarinnar í knattspyrnu eftir 2-0 sigur á spútnikliði Celta Vigo í síðasta leik spænska boltans þessa helgina.

Staðan var markalaus í hálfleik, en Antoine Griezmann kom Atletico yfir í  upphafi síðari hálfleiks. Yannick Ferreira-Carrasco tvöfaldaði svo forystuna þegar tíu mínútur lifðu leiks.

Lokatölur 2-0 og Atletico Madrid því komið á topp deildarinnar með 44 stig. Barcelona er í öðru sætinu með 42 stig, en eiga þó leik til góða og Real Madrid er í því þriðja með 40. Celta er í fimmta sætinu með 31 stig.

Þetta er tólfti leikurinn í deildinni sem Atletico hefur haldið hreinu í, en þeir hafa einungis fengið á sig átta mörk á leiktíðinni, sjö færri en Barcelona sem hefur fengið á sig fimmtán.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira