Erlent

Unglingur réðst á kennara með sveðju í nafni ISIS

Samúel Karl Ólason skrifar
Lögregluþjónar hafa vaktað rúmlega 700 samkomustaði gyðinga síðasta árið.
Lögregluþjónar hafa vaktað rúmlega 700 samkomustaði gyðinga síðasta árið. Vísir/AFP

15 ára unglingur af tyrkneskum uppruna réðst á kennara í borginni Marseille í dag með sveðju. Kennarinn er gyðingur og táningurinn sagðist hafa ráðist á hann í nafni Allah og Íslamska ríkisins. Sá sem fyrir árásinni varð særðist á öxli og hendi en lét ekki lífið. Táningurinn var handsamaður af lögreglu.

Franskur saksóknari sagði blaðamönnum frá yfirlýsingu drengsins í dag, en táningurinn sagði lögregluþjónum að hann hefði einnig ætlað sér að ráðast á lögreglumenn.

Árásarmanninum hefur verið lýst sem prúðum dreng og góðum nemenda sem sýndi engin merki þess að hafa orðið fyrir öfgavæðingu.

Frá því í janúar í fyrra, þegar stuðningsmaður ISIS réðst á matvöruverslun gyðinga í París, hafa rúmlega 700 samkomuhús, bænahús, skólar og félagsheimili gyðinga verið undir vernd lögreglu í París. Fjórir létust í árásinni sem gerð var skömmu eftir árásina á Charlie Hebdo.

Mikil spenna ríkir í Frakklandi þessa dagana þar sem 130 manns létu lífið í árásum vígamanna ISIS fyrir tveimur mánuðum. Um helgina var kveikt í tveimur kirkjum í landinu og þá fannst svínshöfuð við mosku sem rasísk ummæli höfðu verið krotuð á.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira