Innlent

Segir vísindi bráðnauðsynleg en stendur við kenningar um orkulíkamann

Bjarki Ármannsson skrifar
Hildur Þórðardóttir forsetaframbjóðandi segist ekki vilja beygja sig í duftið fyrir ríkjandi skoðunum.
Hildur Þórðardóttir forsetaframbjóðandi segist ekki vilja beygja sig í duftið fyrir ríkjandi skoðunum. Vísir

Hildur Þórðardóttir, forsetaframbjóðandi og rithöfundur, segir að „fræðin um orkulíkamann“ verði einn daginn viðurkennd hér á landi. Fjölmiðlar fjölluðu í síðustu viku um athyglisverðar skoðanir Hildar á orsökum krabbameins, sem hún telur að rekja megi til tilfinninga fólks frekar en genamengis.

Í skoðagrein á Vísi, sem ber heitið „Vísindi efla alla dáð,“ nefnir Hildur fjölmörg afrek vísindasögunnar og segir bráðnauðsynlega grundvallarstoð í samfélagi manna. Hún segir þó að mikilvægt sé að kynna kenningar um „orkulíkamann“ fyrir fólki, frekar en að beygja sig í duftið fyrir ríkjandi viðhorfum.

„Mér er einmitt annt um vísindi og þess vegna vil ég ekki að þau leiðist út á ranga braut,“ skrifar Hildur. „Það er fullt af Íslendingum sem vita af orkulíkamanum og sækja í eða bjóða upp á nálastungur og alls kyns orkumeðferðir. Ég tel að a.m.k. 10% þjóðarinnar viti fullvel að hann er til, 60% þjóðarinnar finnur að þetta gæti alveg verið rétt en þorir ekki, eins og Kóperníkus, að viðurkenna það opinberlega af ótta við útskúfun. Hin 30% eru þá væntanlega rökhyggjufólk sem þarf áþreifanlegar og mælanlegar sannanir til að taka hann með í reikninginn, en sá hópur hefur stjórnað umræðunni hingað til. Þegar farið verður að mæla orkulíkamann með tækjum svipuðum heilaskönnum, getur samfélagið vonandi tekið hann í sátt.“

Grein Hildar má lesa í heild sinni hér.


Tengdar fréttir

Hildur gefur kost á sér til forseta

Rithöfundurinn og þjóðfræðingurinn Hildur Þórðardóttir hefur ákveðið að gefa kost á sér til embættis forseta Íslands í sumar. Hún ætlar að gefa út bók samhliða framboðinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira