Körfubolti

Á einhver úlpu fyrir Kanann hjá Grindavík?

Tómas Þór Þórðarson skrifar
Chuck García í leik með Seattle-háskólanum.
Chuck García í leik með Seattle-háskólanum. vísir/getty

Charles „Chuck“ García, nýi Bandaríkjamaðurinn í liði Grindavíkur í Dominos-deild karla í körfubolta, vanmat aðeins íslenska veturinn.

Hann kom klæddur aðeins þunnum leðurjakka til landsins og auglýsa Grindvíkingar nú eftir úlpu handa honum.

„Lumar einhver á kuldaúlpu í XXL inn í skáp sem er ekki í notkun,“ spyr Sigurbjörn Daði Dagbjartsson, stjórnarmaður hjá Grindavík, á Facebook-síðu sinni.

García er mun vanari góðu veðri enda fæddur og uppalinn í Los Angeles og þá spilaði hann síðast í eyðimerkurhitanum í Barein.

Þrátt fyrir að vera kalt stóð García sig mjög vel í fyrsta leiknum með Grindavík í gær þegar liðið lagði 1. deildar lið Skallagríms á útivelli í bikarnum, 105-96.

García var stigahæstur Grindvíkinga með 27 stig, auk þess sem hann tók fjögur fráköst og gaf fimm stoðsendingar.

Þessi 208 cm hái miðherji á að rífa Grindavík upp úr lægðinni í Dominos-deildinni, en liðið er þar í níunda sæti með aðeins átta stig eftir tólf umferðir.

Lumar einhver á kuldaúlpu í XXL inn í skáp sem ekki er í notkun??Chuck-arinn frá LA mætti í þunnum leddara

Posted by Sigurbjörn Daði Dagbjartsson on Monday, January 11, 2016


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira