Fótbolti

Marklínutæknin líklega notuð á EM í sumar

Tómas Þór Þórðarson skrifar
vísir/vilhelm

Búist er við því að evrópska knattspyrnusambandið tilkynni á föstudaginn að marklínutækni verði notuð á Evrópumótinu í Frakklandi í sumar og í Meistaradeildinni frá og með næstu leiktíð.

Marklínutækni var rædd á fundi dómaranefndar UEFA í París í síðasta mánuði og einnig á fundi framkvæmdastjórnar sambandsins. Ákvörðunin verður gerð opinber í Nyon á föstudaginn.

Michel Platini, forseti UEFA, hefur í langan tíma verið á móti marklínutækni og frekar notað sprotadómara í stærri dómarateymi.

Hann hefur reyndar hallast meira í átt að marklínutækninni undanfarin ár og vildi á síðustu dögum sínum í starfi koma henni í gagnið á stórmótum.

Marklínutæknin er notuð í ensku úrvalsdeildinni, ítölsku Seríu A og 1. deildinni í Þýskalandi og hefur reynst mjög vel. Þá var hún notuð á HM 2014 í Brasilíu og á HM kvenna í kanada í fyrra.

Hér að neðan má sjá dæmi um hvernig marklínutæknin hefur komið að góðum notum í ensku úrvalsdeildinni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira