Innlent

Ekkert óeðlilegt við að fólk hætti við að koma

sunna karen sigurþórsdóttir skrifar
Upplýsingafulltrúi velferðarráðuneytisins segir að alltaf megi búast við að fólk sem boðin hefur verið búseta hér á landi hætti við að koma.
Upplýsingafulltrúi velferðarráðuneytisins segir að alltaf megi búast við að fólk sem boðin hefur verið búseta hér á landi hætti við að koma. vísir/epa

Alltaf má reikna með því að fólk sem boðin hefur verið búseta hér á landi hætti við að koma til landsins, segir Margrét Erlendsdóttir, upplýsingafulltrúi velferðarráðuneytisins. Þrjár sýrlenskar fjölskyldur sem lýst höfðu áhuga á að setjast að á Íslandi og höfðu hér tryggt pláss hafa hætt við að koma.

Margrét segir að ekki sé um einsdæmi að ræða. „Ástæðurnar geta verið margvíslegar og tengjast bara persónulegum aðstæðum fólksins, sem geta verið ýmsar. Þetta er alls ekkert einsdæmi," segir hún.

Ein fjölskylda til viðbótar kemur ekki strax, þar sem í henni er barnshafandi kona. Hún reyndist ekki fær um að takast á við ferðalagið, og frestast því koma fjölskyldunnar um sinn.

Alls koma sex fjölskyldur hingað til lands síðdegis með flugi frá Beirút. Þær millilentu í París en tóku flugið til Keflavíkur klukkan 12.20. Áætlað er að þær lendi klukkan 15.50 í dag.

Í hópnum eru 13 fullorðnir og 22 börn. Yngsta barnið í hópnum er 10 mánaða og það elsta 18 ára. Fólkið hefur fengið fylgd frá Líbanon en með þeim eru meðal annars starfsfólk frá utanríkisráðuneytinu og Flóttamannastofnun Sameinuðu þjóðanna.


Tengdar fréttir

Flóttamennirnir komnir til Parísar

Sýrlensku flóttamennirnir 35 sem koma til landsins í dag voru þreytt en ánægð þegar þau komu til Parísar frá Beirút í morgun.



Fleiri fréttir

Sjá meira