Erlent

Norðmenn senda flóttamenn aftur til Rússlands

Samúel Karl Ólason skrifar
Frá landamærunum í fyrra.
Frá landamærunum í fyrra. Vísir/EPA

Norðmenn sendu í dag þrettán flóttamenn aftur til Rússlands. Til stendur að senda 5.500 manns yfir landamærin en yfirvöld í Noregi tilkynnti fyrir áramót að allir flóttamenn sem kæmu frá löndum sem talin væru örugg yrðu sendir til baka. Í fyrstu átti að senda flóttamennina yfir landamærin á hjólum, þar sem reglur bönnuðu óskráðu fólki að notast við bíla til að fara yfir landamærin.

Fólkinu var einnig bannað að fara gangandi. Þúsundir flótta- og farandfólks fóru á hjólum yfir landamærin til Noregs í fyrra. Með því komust þau í gegnum galla á lögunum. Flestir þeirra voru að flýja átök í Sýrlandi.

Mannréttindasamtök hafa samkvæmt BBC fordæmt brottvísanirnar en að degi til er hitastigið á svæðinu um -30 gráður. Rússar samþykktu nýverið að leyfilegt væri að flytja fólkið með rútum. Þeir þrettán sem voru sendir til baka í dag voru allir með rússnesk vegabréf eða landvistarleyfi þar í landi.

Fólkinu hefur verið komið fyrir í skýli í bænum Kirkenes, nærri landamærum Noregs og Rússlands. Þaðan hafa hins vegar einhverjir flúið af ótta við að vera send aftur til Rússlands. Þá hafa einnig borist fréttir af hungurverkfalli í skýlinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira