Kjær orðaður við PSG og Man. Utd

Danski varnarmaðurinn Simon Kjær hefur verið orðaður við nokkur af stóru félögunum í Evrópu síðustu misseri.

Meðal annars hefur hann verið orðaður við PSG, Inter, Milan, Roma og Man. Utd.

Hann spilar nú með tyrkneska félaginu Fenerbahce en þangað fór hann frá Lille síðasta sumar.

„Ég er auðvitað upp með mér að vera orðaður við þessi félög en ég er ekkert að hugsa um að fara í nýtt félag," sagði Daninn.

„Ég er ákaflega ánægður í herbúðum Fenerbahce og fjölskyldan er ánægð með lífið í Istanbúl. Það er gaman að spila fyrir svona stórlið sem hefur mikinn metnað."

Fenerbache komst ekki í riðlakeppni Meistaradeildarinnar en fór í 32-liða úrslit í Evrópudeildinni og er í öðru sæti í tyrknesku deildinni.