Innlent

Sakar prófessor um rætinn atvinnuróg

Jakob Bjarnar skrifar
Hannes segir Þórð á mála hjá erlendum kröfuhöfum en sá síðarnefndi segir það rætnar lygar.
Hannes segir Þórð á mála hjá erlendum kröfuhöfum en sá síðarnefndi segir það rætnar lygar.
Þórður Snær Júlíusson, ritstjóri Kjarnans, furðar sig á því að Hannes Hólmsteinn Gissurarson, prófessor við Háskóla Íslands, telji sig í stöðu til að „ljúga rætnum atvinnurógi uppá fólk og fyrirtæki og neita síðan að rökstyðja lygarnar.“

Þórður Snær vísar til orða Hannesar, sem féllu á Facebooksíðu þess síðarnefnda, þess efnis að betra væri að fá stuðning frá útgerðarmönnum en erlendum kröfuhöfum.

Roggnir rannsóknarblaðamenn

Hannes Hólmsteinn hafði þá áður tjáð þá skoðun sína að málflutningur Kjarnans um Morgunblaðið og það að hagsmunir sjávarútvegs væru í fyrirrúmi, væri „fáránlegur“: „Blómlegur sjávarútvegur er hagmsunamál allrar þjóðarinnar. Kjarninn (sem er lítið annað en hismi) ætti að líta sér nær. Af hverju hafa hinir roggnu rannsóknarblaðamenn hans ekki rannsakað, hvað varð um Rússagullið, sem rann í sjálfseignarfélag Máls og menningar annars vegar og í Sigfúsarsjóð hins vegar,“ skrifar Hannes og veltir því fyrir sér hvers vegna Kjarninn hafi ekki rannsakað fjárhagsleg tengsl Samfylkingarinnar og Sigfúsarsjóðs. „Er það af því að gjaldkeri Samfylkingarinnar er stór hluthafi í Kjarnanum?“

Blaðamaður Vísis spurði Hannes hvort það væri ekki ekki sérkennileg röksemdafærsla að vilja bæta böl með að benda á eitthvað annað?

„Nei, auðvitað má alveg ræða þetta mál efnislega,“ segir Hannes: „En þú skalt gæta að því, að Kjarninn er að ráðast á aðra fjölmiðla fyrir að vera vandabundna hagsmunaaðilum. Hann ætti að sleppa því samkvæmt lögmálinu, að sá yðar, sem syndlaus er, kasti fyrsta steininum. Ég held raunar, að það sé betra að fá stuðning frá útgerðarmönnum en frá erlendum kröfuhöfum, svo að við höldum okkur áfram við Kjarnann.“

Neitar að rökstyðja lygarnar

Þórður Snær ritstjóri Kjarnans vísar þessu alfarið á bug, á þessum sama vettvangi:

„Ég hef áður beðið Hannes um að sýna fram á hverju hann byggir staðhæfingar sínar um okkur, án þess að honum finnist nokkuð tilefni til þess. Ég er hins vegar tilbúinn að svara hverri þeirri spurningu sem einhver hefur um þetta til að sýna fram á að fullyrðing Hannesar er lygi. Hún á sér enga stoð í raunveruleikanum Hannesi má alveg finnast málflutningur fráleitur og gagnrýna okkur opinberlega. Það er alfarið hans réttur. En prófessor við Háskóla Íslands á ekki að geta leyft sér að ljúga rætnum atvinnurógi upp á fólk og fyrirtæki og neita síðan að rökstyðja lygarnar. Þannig er samt staðan og mér finnst hún segja miklu meira um Hannes en nokkurn annan.“

Fáránlegur málflutningur Kjarnans. Blómlegur sjávarútvegur er hagsmunamál allrar þjóðarinnar. Kjarninn (sem er lítið...

Posted by Hannes Hólmsteinn Gissurarson on 5. janúar 2016



Fleiri fréttir

Sjá meira


×