Innlent

45 milljónir til styrkingar þjónustu BUGL

Atli Ísleifsson skrifar
Í áætluninni kemur fram að um 120 börn bíði eftir þjónustu BUGL og að meðalbiðtími eftir þjónustu sé um níu mánuðir.
Í áætluninni kemur fram að um 120 börn bíði eftir þjónustu BUGL og að meðalbiðtími eftir þjónustu sé um níu mánuðir. Vísir/Þök
Heilbrigðisráðherra hefur veitt 45 milljóna króna styrk til að efla þjónustu göngudeildar barna- og unglingageðdeildar Landspítalans (BUGL).

Í frétt á vef velferðarráðuneytisins kemur fram að ráðherra hafi tilkynnt Landspítala um fjárveitinguna í lok nýliðins árs. Segir að styrkurinn sé veittur á grundvelli tillögu til þingsályktunar um stefnu og aðgerðaáætlun í geðheilbrigðismálum til fjögurra ára sem ráðherra lagði fyrir Alþingi á 145. löggjafarþingi.

Í áætluninni kemur fram að um 120 börn bíði eftir þjónustu BUGL og að meðalbiðtími eftir þjónustu sé um níu mánuðir.

„Mikilvægt sé að stytta biðina og sinna betur ungum börnum og fjölskyldum þeirra. Vísað er til þess að fjöldi rannsókna sýni að snemmtæk inngrip skili mestum árangri og að meðferð taki skemmri tíma en ella ef fljótt er brugðist við.

Samkvæmt þingsályktunartillögunni er miðað við að efla þjónustu á göngudeild BUGL með 29 milljóna króna auknu framlagi á ári í þrjú ár; 2017-2019.

Kristján Þór [Júlíusson heilbrigðisráðherra] segir ánægjulegt að geta aukið fjármuni til að ráðst í þetta verkefni fyrr en áætlað var: „Það er alvarlegt þegar börn og foreldrar þeirra þurfa að bíða mánuðum saman eftir mjög brýnni þjónustu eins og hér um ræðir. Slík bið er erfið barninu og fjölskyldunni og getur reynst afdrifarík. Ég vonast til að með þessu aukna framlagi verði unnt að vinda ofan af þeim vanda sem skapast hefur á BUGL og bæta þjónustuna til muna á næstu mánuðum,“ segir í fréttinni á vef ráðuneytsins.

Göngudeildin nýtist börum sem þurfa þjónustu vegna alvarlegra geðrænna einkenna, ssvo sem þunglyndis, sjálfsvígshugsana og sjáfskaðandi hegðunar.


Tengdar fréttir

Myglusveppur herjar á starfsmenn BUGL

Líkur eru á að færa þurfi starfsemi BUGL í annað húsnæði vegna gruns um myglusvepp. Sveppur fannst í eldri byggingu deildarinnar í sumar, og nú í þeirri nýju.

15-20 prósent íslenskra barna glíma við geðrænan vanda

Fimmtán til tuttugu prósent barna á Íslandi glíma við geðrænan vanda og tíu prósent íslenskra barna eru á einhverskonar geðlyfjum. Framkvæmdastjóri Geðhjálpar segir að þjónustu og úrræði vanti fyrir þennan hóp, og að það enduspeglist í alvarlegri vandamálum síðar meir. Taka þurfi á vandanum.

Fórnarlömb eineltis þriðjungur barna á BUGL

„Hér á landi er skortur á geðheilbrigðisþjónustu fyrir börn og unglinga,“ segir Ellen Sif Sævarsdóttir, klínískur barna- og unglingasálfræðingur sem gerði lokaverkefni sitt í sálfræði við Háskóla Íslands í samstarfi við Dr. Bertrand Lauth barnageðlækni um börn sem hafa fengið þjónustu hjá bráðateymi BUGL.




Fleiri fréttir

Sjá meira


×