Körfubolti

Jakob og félagar upplifðu martröð í þriðja leikhlutanum

Óskar Ófeigur Jónsson skrifar
Jakob Sigurðarson.
Jakob Sigurðarson. Vísir/Andri Marinó

Jakob Sigurðarson og félagar hans í sænska liðinu Borås Basket töpuðu með 28 stiga mun á móti tyrkneska félaginu Türk Telekom, 114-86, í Evrópukeppninni, FIBA Europe Cup, í Boråshallen í kvöld.

Þetta leit mjög vel út fyrir sænska liðið í hálfleik en Tyrkir fóru afar illa með Jakob og félaga í þriðja leikhlutanum sem leikmenn Türk Telekom unnu á endanum með 28 stigum, 40-12.

Eftir þennan skelfilega þriðja leikhluta var á brattan að sækja fyrir Svíana og Tyrkir lönduðu öruggum sigri.

Jakob Sigurðarson var með 11 stig, 4 stoðsendingar og 5 fiskaðar villur í kvöld en aðeins 2 af 12 skotum hans rötuðu rétta leið.

Türk Telekom hefur þar með unnið tvo fyrstu leiki sína í riðlinum en Borås Basket á enn eftir að fagna sigri á þessu stigi keppninnar.

Borås Basket vann fyrsta leikhlutann 29-27 og var fimm stigum yfir í hálfleik, 56-51. Jakob var kominn með 7 stig og 3 stoðsendingar eftir fyrri hálfleikinn.

Borås-liðið byrjaði seinni hálfleikinn mjög illa og Tyrkir tóku frumkvæðið í leiknum með því að vinna fyrstu fimm mínútur þriðja leikhlutans 23-10.

Türk Telekom var síðan 23 stigum yfir fyrir lokaleikhlutann, 91-68, og úrslit leiksins svo gott sem ráðin.

Borås Basket tapaði illa fyrir Telenet Oostende í fyrsta leiknum í milliriðlum en liðunum í 32 liða úrslitunum er skipt niður í átta fjögurra liða riðla og komast tvö efstu liðin í sextán liða úrslit.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira