Fótbolti

Messi með tvö mörk og tvær stoðsendingar í fyrsta leik ársins

Óskar Ófeigur Jónsson skrifar
Neymar og Andrés Iniesta fagna Lionel Messi í kvöld.
Neymar og Andrés Iniesta fagna Lionel Messi í kvöld. Vísir/Getty

Barcelona vann 4-1 heimasigur á nágrönnum sínum í Espanyol í fyrri leik liðanna í sextán liða úrslitum spænska konungsbikarsins í fótbolta á Nývangi í kvöld.

Barcelona-maðurinn Lionel Messi byrjar árið á fullu skriði en hann skoraði tvö mörk í kvöld og lagði hin tvö fyrir félaga sína, Gerard Piqué og Neymar.

Seinni leikur liðanna fer síðan fram á heimavelli Espanyol í næstu viku. Barcelona er því í mjög góðum málum og ætti að eiga frekar auðvelt með að tryggja sér sæti í átta liða úrslitunum.

Leikmenn Espanyol fengu samt draumabyrjun þegar Felipe Caicedo kom liðinu í 1-0 strax á 8. mínútu leiksins.

Espanyol var þó bara yfir í fimm mínútur því Lionel Messi jafnaði á 13. mínútu eftir stoðsendingu frá Andrés Iniesta.

Messi kom Barcelona síðan í 2-1 með marki beint úr aukaspyrnu á 44. mínútu leiksins.

Gerard Piqué skoraði þriðja mark Barcelona eftir aðeins fimm mínútna leik í seinni hálfleiks.

Fjórða markið kom síðan í uppbótartíma og það skoraði Neymar eftir stoðsendingu frá Lionel Messi.

Lionel Messi skorar hér seinna markið sitt beint úr aukaspyrnu. Vísir/Getty


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira