Fótbolti

Messi með sýningu í öruggum sigri Barcelona

Lionel Messi.
Lionel Messi. Vísir/Getty

Argentínski snillingurinn Lionel Messi var allt í öllu í öruggum 4-0 sigri Barcelona á Granada á heimavelli í dag en með sigrinum skaust Barcelona um tíma upp fyrir Atletico Madrid í efsta sæti spænsku úrvalsdeildarinnar.

Eftir markalaust jafntefli gegn nágrönnunum í Espanyol um síðustu helgi voru lærisveinar Luis Enrique harðákveðnir í að ná toppsætinu af Atletico Madrid á ný.

Messi var í miklu stuði og skoraði fyrstu tvö mörk leiksins og var Barcelona komið 2-0 yfir þegar aðeins korter var búið að leiknum.

Messi bætti við þriðja marki sínu og þriðja marki Barcelona í leiknum þegar hann náði frákastinu af skoti Neymars og setti boltann í autt netið.

Neymar var síðan sjálfur á ferðinni sjö mínútum fyrir leikslok þegar fyrirgjöf Luis Suárez rataði alla leiðina á Neymar á fjærstönginni og setti hann boltann yfir liggjandi markmann Granada.

Sannfærandi 4-0 sigur staðreynd og náði Barcelona toppsætinu á ný í bili en Atletico Madrid getur komist aftur upp fyrir Barcelona með sigri á Celta Vigo annað kvöld.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira