Innlent

Lögregla stöðvaði unglingapartý í Mosfellsbæ

Atli Ísleifsson skrifar
Lögregla handtók ölvaðan og blóðugan mann á veitingahúsi í miðborg Reykjavíkur síðdegis í gær eftir að hann neitaði að fara út.
Lögregla handtók ölvaðan og blóðugan mann á veitingahúsi í miðborg Reykjavíkur síðdegis í gær eftir að hann neitaði að fara út. Vísir/GVA
Lögreglan á höfuðborgarsvæðinu hafði afskipti af unglingapartýi í Mosfellsbæ um miðnætti þar sem tuttugu ungmennum vísað út en húsráðandinn 15 ára svaf ölvunarsvefni. Foreldrum var tilkynnt um málið.

Lögregla handtók ölvaðan og blóðugan mann á veitingahúsi í miðborg Reykjavíkur síðdegis í gær eftir að hann neitaði að fara út. Hann var vistaður í fangageymslu sökum ástands síns.

Tilkynnt var um menn við heimili í Fossvogi þar sem þeir voru að stela gaskútum frá grillum.  Lögreglu tókst ekki að hafa hendur í hári þeirra.

Skömmu fyrir miðnætti var ölvaður maður handtekinn í Kópavogi, en hann hafði ítrekað hringt í 112 og fleiri neyðarnúmer.  Maðurinn var ekki viðræðuhæfur og vistaður í fangageymslu.

Um hálf tvö í nótt var tilkynnt um líkamsárás á veitingahúsi í Breiðholti. Maður var þar sleginn í andlitið og rotaðist. „Sjúkralið og lögregla á vettvang en maðurinn sem var orðinn vel áttaður vildi enga aðstoð.  Gerandinn var farinn af vettvangi,“ segir í dagbók lögreglu.

Upp úr klukkan tvö var tilkynnt um rúðubrot á pizzastað í Breiðholti. „Er lögregla kom á vettvang voru tveir menn að yfirgefa vettvang í bifreið og sögðu vitni farþegann hafa brotið rúðuna.  Farþeginn var ölvaður og skorinn á hendi.  Lögreglumenn fóru með manninn á Slysadeild til aðhlynningar og var hann síðan vistaður sökum ástands í fangageymslu fyrir rannsókn máls. Ökumaðurinn var handtekinn  grunaður um ölvun við akstur og var hann laus að lokinni upplýsinga- og sýnatöku.“

Rétt fyrir klukkan þrjú í nótt var tilkynnt um yfirstandandi innbrot á heimili í Kópavogi. Dökkklædd manneskja var þá búin að brjóta rúðu og hafði farið inn. „Er lögregla kom á vettvang kom í ljós að húsráðandi (ung kona) hafði gleymt lyklum af íbúðinni og brotið sér leið inn. Konan var skorin á hendi og var henni ekið á Slysadeild til aðhlynningar,“ segir í dagbók lögreglunnar á höfuðborgarsvæðinu.




Fleiri fréttir

Sjá meira


×