Innlent

Leið þjófsins um Fjörð: Lævís eins og köttur eða heppinn?

snærós sindradóttir skrifar
Hér má sjá leið þjófsins um verslunarmiðstöðina Fjörð.
Hér má sjá leið þjófsins um verslunarmiðstöðina Fjörð. fréttablaðið

„Hann var eins og kisi,“ segir Guðmundur Bjarni Harðarson, framkvæmdastjóri Fjarðar, um lipra, smávaxna og skjóta þjófinn sem fór ránshendi um verslunina Úr og gull á laugardag. Þjófurinn er enn ófundinn en margt bendir til þess að um vanan mann hafi verið að ræða.

Ein húsleit hefur verið gerð en enginn hefur enn verið handtekinn.

Nýjar vísbendingar benda til þess að ránið hafi ekki verið jafn þaulskipulagt og áður hefur verið talið. Þjófurinn er grunaður um að hafa spennt upp hurð á Snyrtistofunni Rósu áður en hann lét til skarar skríða við Úr og gull. Það er í hróplegu ósamræmi við aðra hluta ránsins, að hafa með sér smáfé úr afgreiðslukassa snyrtistofunnar.

Þjófurinn gengur rakleiðis að glugga á vinstri hlið verslunarinnar Úr og gulls. Þar braut hann lítið gat með kúbeininu og smeygði sér inn.

Sannað þykir að símtal, sem barst Öryggismiðstöðinni klukkan sex um morguninn og varð til þess að þjófavarnarkerfið var tekið af húsinu, hafi verið frá umhyggjusömum vegfaranda. Þjófurinn hafi verið heppinn að slökkt var á öryggiskerfinu.

„Það eru alls konar vangaveltur. Ég held að þetta gæti alveg eins hafa verið þannig að eitt leiddi af öðru. Við vitum það ekki fyrr en við erum búin að finna gaurinn,“ segir Helgi Gunnarsson rannsóknarlögreglumaður sem fer með málið.

Það þykir ljóst af myndböndum úr eftirlitsmyndavélum verslunarinnar Úr og gull að þar var þjófurinn á heimavelli. Hann hafði greinilega vitneskju um hvar dýrustu vörur verslunarinnar væri að finna og snerti ekki við öðru. Þjófurinn gekk ákveðið til verks.

Þjófurinn reynir að brjóta sér leið inn í miðstöðina um þessa hurð en án árangurs. Fyrir innan sést snyrtistofan sem hann er grunaður um að hafa brotist inn í líka.

„Hann gengur á allt það dýrasta. Hann lætur Hugo Boss-úrin í friði og Kenneth Cole og Seiko,“ segir Ásgeir Ingvarsson, eigandi verslunarinnar. Hann segir þjófinn hafa haft á brott með sér hátt í tuttugu Raymond Weil-úr sem kostuðu á bilinu 300 til 800 þúsund krónur.

Einnig tók þjófurinn dýra ítalska demantshringa sem sumir kostuðu hátt í eina milljón króna. Dýrir gullskartgripir hurfu jafnframt með þjófnum en silfur og ódýrari munir voru látnir í friði.

Aðspurður hvort starfsfólk hafi orðið vart við grunsamlegar mannaferðir segir Ásgeir: „Það eru alltaf einhverjir grunsamlegir en ekkert sem hönd er á festandi.“

Samkvæmt heimildum Fréttablaðsins hafa eftirlitsmyndbönd Fjarðar verið skoðuð nokkuð aftur í tímann í þeirri von að finna mann sem gæti passað við þjófinn. Það hefur ekki borið árangur. Þá hafi lögregla fengið upplýsingar um grunsamlega menn á ferli í verslunarmiðstöðinni án þess að nokkuð hafi komið upp úr kafinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.