Matur

Gourmet naut á grillið að hætti Eyþórs

Eyþór Rúnarsson skrifar
Vísir/Stöð 2

Nautastrimlar með girnilegu salati sem meðlæti og hindberja-vinagrette.

Grillaðir nautastrimlar

Uppskrift fyrir 4

400 g nautafilet (fullhreinsað)
100 ml appelsínusafi
100 ml ólífuolía
1 tsk. fínt salt
½ hvítlauksgeiri

Skerið kjötið í 100 gramma steikur og berjið það með kjöthamri þar til það er orðið 5 mm að þykkt. Setjið appelsínusafann og olíuna saman í matvinnsluvél og vinnið saman í 1 mín.
Hellið blöndunni yfir kjötið og látið kjötið standa í 1-2 tíma. Setjið kjötið á heitt grillið og grillið í um 1,5 mín á hvorri hlið. Takið af grillinu og setjið álpappír yfir og látið standa í 10 mín.

Hindberja-vinaigrette
100 ml ólífuolía
100 g frosin hindber
2 msk. balsamik-edik
2 msk. hlynsíróp

Setjið allt hráefnið í blandara og blandið vel saman.

Meðlæti
1 stk. gráðaostur
1 stk. rauðlaukur (skrældur)
½ stk. grasker
½ stk. hunangsmelóna
50 ml ólífuolía
1 msk. hvítlauksduft
1 tsk. cayenne-pipar
1 box baunaspírur

Skerið rauðlaukinn í tvennt og graskerið í 5 mm þykkar sneiðar og setjið í skál með þurrkryddunum og ólífuolíunni. Blandið öllu saman og kryddið með salti og pipar og látið standa í 2 tíma.

Setjið á heitt grillið og grillið í 4 mín. á hvorri hlið eða þar til hvort tveggja er eldað í gegn. Skrælið og skerið melónuna í stóra kubba og myljið gráðaostinn niður.

Skerið kjötið í þunna strimla og setjið allt saman á fat.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira