Innlent

„Ættleiðingar eru bara óafturkræfur gjörningur“

Birgir Olgeirsson skrifar
Guðlaug Elísabet Ólafsdóttir.
Guðlaug Elísabet Ólafsdóttir. Vísir/Valli

„Ættleiðingar eru bara óafturkræfur gjörningur og það er ekki hægt að rugla í því, skiljanlega,“ segir leikkonan Guðlaug Elísabet Ólafsdóttir við Kastljósið sem mun fjalla um ýmsar hliðar staðgöngumæðrunar í þætti sínum í kvöld.

Kastljós setti inn stiklu úr þættinum á Facebook-síðu sína þar sem kemur fram að Guðlaug ákvað að vel athuguðu máli að eignast barn fyrir frænda sinn og eiginmann hans. Eftir að barnið kom í heiminn varð Guðlaugu ljóst að skilningur hennar var ekki sá sami og hjá frænda hennar og eiginmanni hans höfðu á málinu og hefur hún ekki fengið að umgangast barnið eins og hún hefur óskað eftir.

„Þannig að nei, það gekk ekki eftir. Ég verð bara að bíða. Börn leita uppruna síns. Svo er þetta bara tímaspursmál.“


Kastljós fjallar um ýmsar hliðar staðgöngumæðrunar í kvöld. Við sýnum viðtal við Guðlaugu Elísabetu Ólafsdóttur, sem...

Posted by Kastljós on Thursday, September 24, 2015

Fyrir Alþingi liggur stjórnarfrumvarp frá Kristjáni Þór Júlíussyni heilbrigðisráðherra um staðgöngumæðrun í velgjörðarskyni. Er frumvarpinu ætlað að stuðla að vandaðri framkvæmd staðgöngumæðrunar í velgjörðarskyni til að tryggja hag og réttindi barns sem fæðist eftir staðgöngumæðrun, rétt, sjálfræði og velferð staðgöngumóður og fjölskyldu hennar og farsæla aðkomu væntanlegra foreldra.

Sjá einnig: Samkynhneigðir karlar geti nýtt sér staðgöngumæðrun

Í viðtalinu við Kastljós, sem sýnt verður í kvöld, hvetur Guðlaug konur til að hugsa sig tvisvar um áður en þær bjóðast til að vera staðgöngumæður.

„Þær konur sem eru tilbúnar að vera staðgöngumæður í velgjörðarskyni, þær hafa aldrei misst barn,“ segir Guðlaug.

Jóhanna María Sigmundsdóttir, þingmaður Framsóknarflokksins, hefur talað fyrir staðgöngumæðrun. vísir/pjetur

Staðgöngumæðrun hefur verið til umfjöllunar í samfélaginu um skeið. Í samtali við Fréttablaðið í ágúst síðastliðnum sagði Jóhanna María Sigmundsdóttir, þingmaður Framsóknarflokksins, að hún vildi leyfa staðgöngumæðrun í velgjörðarskyni.

Jóhanna sagðist vona að almennileg umræða muni skapast um málið  þegar frumvarpið verður tekið fyrir á þingi. „Ég vona að hún verði litríkari en bara já eða nei, að rætt verði hvað sé hægt að gera til að bæta frumvarpið og umræðan verði tekin á hærra stig. Ég vil endilega bæta þetta frumvarp eins mikið og hægt er.“

Sjá einnig: Vill umræðu um staðgöngumæðrun: „Kraftaverk ef ég get sjálf gengið með barn“

Þó svo að staðgöngumæðrun sé ekki leyfð hér á landi eru nokkur dæmi um slík tilvik, líkt og hjá Guðlaugu. Stöð 2 sagði til að mynda frá hjónum í febrúar síðastliðnum sem komust í samband við íslenska konu á lokaðri Facebook síðu sem var reiðubúin að ganga með barn þeirra.

Hjónin skildu að nafninu til og skráði eiginkonan sig í sambúð með konunni svo hún gæti farið í tæknifrjóvgun hjá Art Medica.


Tengdar fréttir

Þóttust vera lesbískt par til að reyna staðgöngumæðrun

Íslensk kona, sem setti sig í samband við hjón sem auglýstu eftir staðgöngumóður á Facebook, gerði tvisvar á síðasta ári tilraunir til að ganga með barn fyrir þau. Í seinna skiptið var það reynt hér á landi, þrátt fyrir að það væri ólöglegt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira