Viðskipti innlent

Sjávarbotnsrannsókn hafin vegna strengs til Bretlands

Kristján Már Unnarsson skrifar
Viðamesta rannsókn til þessa vegna raforkusæstrengs milli Íslands og Bretlands hófst í dag þegar rannsóknarskip lagði úr höfn í Færeyjum til að mynda hafsbotninn. Félag í eigu breskra fjárfesta kostar leiðangurinn.

Rannsóknarskipið Stril Explorer, frá sænska fyrirtækinu MMT, er búið fjarstýrðum kafbáti sem notaður verður til að ná sónarmyndum af hafsbotninum milli Íslands og Færeyja. Annað skip myndar síðan botninn milli Færeyja og Bretlands og starfa um fimmtíu manns að rannsókninni. Kostnaður er ekki gefinn upp en áætla má að hann hlaupi á nokkur hundruð milljónum króna enda eiga skipin að verja alls tveimur mánuðum í verkefnið.

Félag breskra fjárfesta sem vilja fjármagna strenginn, Atlantic Superconnection, stendur að rannsókninni en helsti talsmaður þess er Charles Hendry, fyrrverandi orkumálaráðherra Bretlands. Sem ráðherra undirritaði hann einmitt viljayfirlýsingu fyrir þremur árum um athugun á sæstreng til raforkuflutninga milli landanna.

Hafsbotnsrannsóknin er gerð með leyfi Orkustofnunar og er ein helsta forsenda þess að meta hvort lagning sæstrengs sé tæknilega og fjárhagslega fýsileg. Þetta er jafnframt langviðamesta verkefnið sem lagt hefur verið í til þessa vegna sæstrengsins.

Charles Hendry, fyrrverandi orkumálaráðherra Bretlands, er helsti talsmaður Atlantic Superconnection.Mynd/Stöð 2.
Charles Hendry sagði í dag að ákvörðun um hvort halda eigi áfram að skoða fýsileika þess að leggja sæstreng milli Íslands og Bretlands liggi hjá íslensku þjóðinni og stjórnvöldum. 

„ASC hefur eytt umtalsverðum tíma í að meta hagfræðilegar og tæknilegar forsendur verkefnisins og telur að sæstrengur yrði bæði íslensku efnahagslífi og Bretlandi til hagsbóta. Bresk stjórnvöld vinna nú þegar að því að skipulegga framtíðaráform í orkumálum landsins og því er mikilvægt að Íslendingar dragi ekki of lengi að skýra afstöðu sína til málsins. Því tökum við þetta skref nú svo að unnt verði að halda áfram án tafar ef íslensk stjórnvöld og Íslendingar ákveða svo,“ sagði Charles Hendry.


Tengdar fréttir

Sæstrengur til skoðunar af fullri alvöru hjá báðum ríkjum

Heimsókn orkumálaráðherra Bretlands til Íslands staðfestir að sæstrengur milli landanna er kominn til skoðunar fyrir alvöru. Ráðherrann átti viðræður við utanríkisráðherra og Landsvirkjun um málið í dag. Breski orkumálaráðherrann, Charles Hendry, hóf daginn á ráðstefnu í höfuðstöðvum Arion banka.

Fjármögnun raforkusæstrengs komin á fullan skrið

Fjármögnun sæstrengs milli Íslands og Bretlands er komin á fullan skrið og er leidd af breskum fjárfestum og fyrrverandi orkumálaráðherra Bretlands. Framkvæmdastjóri viðskiptaþróunar hjá Landsvirkjun segir að beðið sé eftir samkomulagi stjórnvalda þessara landa.

Sæstrengur gæti skilað áttfalt hærra orkuverði

Nýir samningar sem norsk orkufyrirtæki hafa gert við bresk stjórnvöld um sölu vindorku í Bretlandi benda til að gífurlegur hagnaður geti orðið af raforkusölu um sæstreng frá Íslandi.

Segir sæstrengsmál í hárréttum farvegi

Ragnheiður Elín Árnadóttir vísar því á bug að vinna stjórnvalda við mat á kostum og göllum við lagningu sæstrengs sé í hægagangi. Hún segir samskipti við Breta um málið í eðlilegum farvegi og niðurstaðna úr undirbúningsvinnu að vænta.






Fleiri fréttir

Sjá meira


×