Handbolti

Þegar Ísland slátraði Frökkum í Bördelandhalle

Henry Birgir Gunnarsson skrifar
Alfreð Gíslason landsliðsþjálfari missti sig algjörlega í þessum leik.
Alfreð Gíslason landsliðsþjálfari missti sig algjörlega í þessum leik. vísir/pjetur
Einn eftirminnilegasti leikur í sögu strákanna okkar var gegn Frökkum á HM 2007. Þá valtaði Ísland yfir franska liðið, 32-24, þegar allt var undir.

Sá leikur fór fram í Bördelandhalle í Magdeburg og var spilaður degi eftir mjög óvænt tap gegn Úkraínu. Staðan var ósköp einföld fyrir leik. Ísland varð að vinna, annars færi liðið heim með skottið á milli lappanna.

Þeir voru líklega ekki margir sem höfðu trú á því að Ísland gæti strítt ofurliði Frakka í leiknum. Ekki síst í ljósi hörmulegrar spilamennsku gegn Úkraínu. Annað kom á daginn. Strákarnir sýndu í þessum leik að þeir gætu unnið hvaða lið sem er í heiminum.

Fögnuður strákanna eftir leik stóð lengi. Það vildi enginn hætta að fagna.vísir/pjetur
„Þessa leiks verður minnst sem eins besta landsleiks Íslands fyrr og síðar. Fyrri hálfleikur hjá Íslandi í gær fer í bækurnar sem einn besti hálfleikur í sögu landsliðsins. Það fullyrði ég. Leikur liðsins í fyrri hálfleik var nánast fullkominn og það gekk allt upp. Sama hvar gripið er niður," skrifaði ofanritaður í Fréttablaðið daginn eftir leik.

Ísland leiddi með tíu mörkum í hálfleik, 18-8, og hélt áfram að lemja á Frökkum í þeim síðari. Um miðjan seinni hálfleik áttuðu menn sig á því það mætti ekki vinna Frakka með of miklum mun. Annars hefði liðið farið stigalaust í milliriðil.

Það óraði engan fyrir því að strákarnir gætu flengt Frakkana með slíkum mun. Þess vegna var enginn búinn að spá í markamuninum fyrr. Alfreð Gíslason, þáverandi landsliðsþjálfari, varð því að skipa sínum mönnum að leyfa Frökkum að skora nokkur mörk. Ótrúleg staða.

„Ég hefði aldrei getað ímyndað mér það þrem mínútum fyrir leikslok að hafa áhyggjur af því að vinna leikinn of stórt. Ef við hefðum sigrað með tólf mörkum eða meira hefði Úkraína farið áfram og við með en án stiga. Ég bað því leikmenn um að hægja á og passa sig,“ sagði Alfreð og hló mjög dátt í viðtali við Fréttablaðið eftir leik en hann hefur aldrei sést fagna sigri á álíka hátt og eftir þennan leik. Hljóp og hoppaði um allt eins og óður maður.

Alfreð á flugi um fjalir Bördelandhalle eftir leik.vísir/pjetur
Skemmst er líka frá því að segja að Úkraínumennirnir brjáluðust við þetta enda þýddu lokatölurnar að Úkraínumenn fóru heim þrátt fyrir glæstan sigur á Íslandi.

Bördelandhalle þetta kvöld var líklega einn sterkasti heimavöllur sem Ísland hefur spilað á. Nánast hver einasti maður í þessu tæplega 8 þúsund manna húsi hélt með Íslandi og öskraði liðið áfram.

Ástæðan er sú að það voru Magdeburgar-goðsagnir á gólfinu. Alfreð Gíslason þjálfaði liðið á sínum tíma og Ólafur Stefánsson, Sigfús Sigurðsson og Arnór Atlason höfðu svo allir spilað með liðinu. Fyrir vikið fékk Ísland ótrúlegan stuðning frá fólkinu í Magdeburg.

„Í nótt var ég nánast í sjálfsmorðhugleiðingum en það er ljóst að ég fæ að lifa eitthvað lengur. Liðið sýndi alveg hreint ótrúlegan karakter hér í dag og ég er ótrúlega stoltur af liðinu. Þetta var eins og að spila á heimavelli annars og áhorfendur ótrúlegir allir saman,“ sagði Alfreð Gíslason landsliðsþjálfari kampakátur eftir leikinn.

Hér að neðan má sjá helstu atvik úr leiknum ótrúlega. Leik sem var líklega sá besti í sögu íslenska landsliðsins.

Guðjón Valur faðmar hér Dag Sigurðsson, fyrrum landsliðsfyrirliða, en hann var einn fjölmargra Íslendinga á vellinum.vísir/pjetur

Tengdar fréttir

Aron Pálmars: Spilum yfirleitt vel á móti Frökkum

Aron Pálmarsson lék vel með íslenska landsliðinu í sigrinum á Alsír í fyrrakvöldi. Hann vakti lengi fram eftir um kvöldið til þess að fylgjast með leik Seattle Seahawks og Green Bay Packers í ameríska fótboltanum.

Trúum að við getum unnið Frakka

Arnór Atlason segir að innan íslenska landsliðshópsins ríki full trú á því að sigur geti unnist gegn sterku liði Frakklands á HM í handbolta.




Fleiri fréttir

Sjá meira


×