Innlent

Verkfalli lækna frestað

Kolbeinn Tumi Daðason og Sunna Karen Sigurþórsdóttir skrifa
Verkfallsaðgerðir lækna í Læknafélagi Íslands hafa staðið yfir með hléum frá 27. október eða í tæpar ellefu vikur.
Verkfallsaðgerðir lækna í Læknafélagi Íslands hafa staðið yfir með hléum frá 27. október eða í tæpar ellefu vikur. vísir/ernir

Uppfært klukkan 04:10
Sigurveig Pétursdóttir segir að um algjöra uppstokkun á samningi lækna við ríkið sé að ræða. Nánar má lesa um viðbrögð Sigurveigar, ríkissáttasemjara og formanns samninganefndar ríkisins með því að smella hér.

Uppfært klukkan 03:27
Fjölmiðlafólk bíður nú á skrifstofu ríkissáttasemjara eftir því að samningaaðilar yfirgefi fundinn. Verið er að lesa samninginn yfir fyrir undirskrift. Elísabet Ólafsdóttir, skrifstofustjóri ríkissáttasemjara, var búinn að gera deigið klárt og er nýbyrjuð að baka fyrstu vöfflurnar. Von er á fulltrúum lækna og ríkis á næstu mínútum og verður þá skrifað undir.

Elísabet segir við fjölmiðlamenn að deiluaðilar vilji nánast undantekningalítið fá vöfflur þegar samningar nást óháð því hvað klukkan slær.

Uppfært klukkan 02:50

Samningar hafa náðst í deilu lækna við íslenska ríkið. Verið er að ganga frá smáatriðum og verður skrifað undir nýjan kjarasamning um klukkan 3:30 í nótt. Samningurinn verður svo borinn undir lækna í Læknafélagi Íslands til staðfestingar á næstunni. Fundað hafði verið í rúma fjórtán tíma í dag.

Elísabet Ólafsdóttir, skrifstofustjóri ríkissáttasemjara, var búin að gera vöffludeigið klárt um klukkan 3:20 í nótt. Vísir/Kolbeinn Tumi

Líkur á að samið verði í nótt (frétt skrifuð klukkan 01:00)
Heimildir fréttastofu herma að vel miði í samningaviðræðum lækna og ríkisins og líkur eru á að skrifað verði undir samning á næstu klukkustundum. Hvert tilboð ríkisins er, er þó enn óljóst.

Samninganefnd lækna og ríkisins hafa fundað í húsakynnum ríkissáttasemjara frá klukkan eitt í dag, eða í um tólf klukkustundir. Um kvöldmatarleyti fengust þær upplýsingar að nokkuð hefði þokast í samkomulagsátt en ekki lá fyrir hvort sátt væri í sjónmáli.

Verkfallsaðgerðir lækna í Læknafélagi Íslands hafa staðið yfir með hléum frá 27. október eða í tæpar ellefu vikur. Verkfallið hefur skapað mikla óvissu á Landspítalanum og haft í för með sér ýmis konar truflanir. Á mánudag hófst svo víðtækara verkfall en nokkru sinni fyrr en um er að ræða tvöfalt lengri verkfallslotu en áður.


Tengdar fréttir

Sex barnshafandi konur eru í óvissu

Sex konur bíða þess að vita hvort þær komist í keisaraskurð á Landspítala. Óvissa er um aðgerðirnar vegna kjaradeilu lækna. Krísuástand er á spítölum landsins vegna verkfallsaðgerða að mati framkvæmdastjóra lækninga.

Allar líkur á verkfalli lækna

Allar líkur eru á að verkfall lækna skelli á á miðnætti að mati formanns Læknafélags Íslands. Samningafundur lækna og ríkisins í gær reyndist árangurslaus.

Útiloka lög á verkfallið

Við upphaf ríkisráðsfundar í morgun á Bessastöðum gáfu bæði fjármálaráðherra og heilbrigðisráðherra þau svör að ekki væri í boði að setja lög á verkfallið eins og stendur.

Ólíklegt að launadeila lækna leysist fyrir áramót

Lítið þokast í kjaradeilu lækna. Formaður Læknafélags Reykjavíkur segir stjórnvöld senda læknum skilaboð um að þeir séu einskis virði. Hertar verkfallsaðgerðir hefjast 5. janúar náist ekki að semja fyrir þann tíma.



Fleiri fréttir

Sjá meira