Bíó og sjónvarp

Íslensk draugatrú bætti upp söguna

Þórður Ingi Jónsson skrifar
Grófust fyrir atburðinn frá öllum hliðum -  Hjálmtýr og félagar leituðu uppi ættingja þeirra sem fórust.
Grófust fyrir atburðinn frá öllum hliðum - Hjálmtýr og félagar leituðu uppi ættingja þeirra sem fórust. fréttablaðið/GVA

„Þetta var flugslys sem verður í nóvember 1941 í Kolgrafafirði á Snæfellsnesi. Flugmenn sem eru að koma úr eftirlitsflugi með kafbátum og herskipum Þjóðverja milli Grænlands og Íslands taka feil á Faxaflóanum og fljúga inn Breiðafjörðinn, síðan fljúga þeir áfram suður og rekast á þennan tind, Svartahnjúk,“ segir Hjálmtýr Heiðdal, leikstjóri heimildarmyndarinnar Svartahnjúks sem fjallar um þetta myrka atburð í sögu Íslands.

„Þeir farast allir, sex manns. Leitarflokkar eru sendir á vettvang með íslenskum bændum sem finna aðeins fjögur lík. Þá komu upp ýmsar draugasögur en það voru iðulega tveir menn á gangi sem sjást þarna innst í Kolgrafafirði. Íslensk þjóðtrú bætir upp söguna.“

Hjálmtýr hefur unnið að myndinni seinustu fjögur árin ásamt handritshöfundinum Karli Smára Hreinssyni. Í myndinni eru tekin viðtöl við eldra fólk á Snæfellsnesi sem lifði þessa atburði ásamt fólki sem ólst upp með leitarmönnunum.

John Ewart Speak, flugstjóri vélarinnar sem fórst við Svartahjnúk.

„Síðan fórum við til Englands til að hitta breska flugmenn sem voru hér í stríðinu. Þá fundum við ættingja mannanna sem fórust. Við erum dálítið búin að grafast fyrir um þennan atburð frá öllum liðum má segja. Við fórum upp á fjallið á Snæfellsnesi til að skoða flakið og meira að segja draugarnir sjálfir koma fyrir í einni senunni. Við vorum að fjalla um draugana í viðtali á staðnum þar sem líkin voru borin niður af fjallinu, þá kom svakalegur vindur sem henti öllu um koll,“ segir Hjálmtýr og hlær.

Aðstandendur myndarinnar halda nú úti söfnun á Karolina Fund því að notast var við meira af gömlum kvikmyndum úr stríðinu en var upprunalega áætlað. „Þess vegna reyndist það dýrara og því settum við af stað þessa söfnun, sem er komin vel á veg.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.