Innlent

Lengra verkfall ekki látið kjurt liggja

Óli Kristján Ármannsson skrifar
Á baráttufundi KÍ í Hörpu. Fjöldi listamanna auk ræðumanna stigu á svið í Norðurljósasalnum síðdegis í gær. Fréttablaðið/Stefán
Á baráttufundi KÍ í Hörpu. Fjöldi listamanna auk ræðumanna stigu á svið í Norðurljósasalnum síðdegis í gær. Fréttablaðið/Stefán

Frestað var til dagsins í dag samningafundi tónlistarskólakennara sem stóð hjá Ríkissáttasemjara frá klukkan ellefu til fjögur í gær.

Tónlistarskólakennarar lögðu niður störf 22. október síðastliðinn og verkfall þeirra er því að teygja sig inn í fimmtu viku.

Kennarasamband Íslands (KÍ) stóð í gær fyrir samstöðufundi til stuðnings tónlistarkennurum.

Með því segir Aðalheiður Steingrímsdóttir, varaformaður KÍ, hafnar aðgerðir til stuðnings félögum KÍ í verkfalli.

Kennarar í Menntaskólanum á Akureyri og Verkmenntaskólanum lögðu niður störf klukkan tvö í gær til að sýna tónlistarkennurum stuðning í verki.

Aðalheiður Steingrímsdóttir

Aðalheiður segir KÍ hafa sent út áskorun til forystufólks félaga um land allt um að styðja tónlistarkennara.

Hún segir hins vegar ekkert hægt að spá um frekari aðgerðir annarra hópa innan HÍ dragist verkfall tónlistarskólakennara enn á langinn. Hún sagði þó ljóst að það myndi ekki verða „látið kjurt liggja“.

Í ályktun samstöðufundar KÍ í Hörpu í gær var samþykkt ályktun þar sem segir: „Mál er að linni. Við krefjumst þess að samið verði strax við tónlistarkennara svo að þeir geti snúið aftur til sinna mikilvægu starfa.“

Á fundinum talaði fjöldi ræðumanna og tónlistarfólks.

„Fjögurra vikna verkfall! Nú er nóg komið, við viljum samninga strax,“ sagði Þórður Árni Hjaltested, formaður KÍ, á fundinum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira