Lífið

Sækja innblástur í skelfiskilm og kyrrð í Hrísey

Nanna Elísa Jakobsdóttir skrifar
Hæfileikarík Hluti af hópnum fyrir utan húsið þar sem töfrarnir gerast. Fjöllin í baksýn veita innblástur að sögn skipuleggjenda.
Hæfileikarík Hluti af hópnum fyrir utan húsið þar sem töfrarnir gerast. Fjöllin í baksýn veita innblástur að sögn skipuleggjenda.

„Hér eru enn þá skelfisknet og fiskikör og allt ilmar enn þá af skelfiski,“ segir Ásgerður Birna Björnsdóttir myndlistarnemi, þar sem hún stendur inni í Salthúsinu í Hrísey og undirbýr listsýningu næstu helgi.

Ásgerður Birna skipulagði ásamt vinkonu sinni, Helenu Aðalsteinsdóttur myndlistarkonu, viku í Hrísey fyrir alla þá sem hafa áhuga á listum, bæði menntaða og ómenntaða.

„Það er áhugavert að koma hingað til Hríseyjar og vinna að myndlist vegna þess að svæðið hér er mjög afmarkað og virkar þannig á mann að maður aftengist Reykjavík og öllu áreitinu þar,“ segir Helena.

Vikuna kalla þau Laumulistasamsteypuna og er hún vettvangur fyrir listaáhugafólk til að skapa saman list.

Hér eru listakonurnar fyrir framan húsið þar sem sýningin verður haldin næstu helgi. Mynd/Arna María

Alls konar getur gerst 
„Við gerðum beinagrind að dagskrá en alls konar getur gerst,“ útskýrir Ásgerður Birna. „Við viljum hafa þetta opið enda eru alls konar hugmyndir í gangi. Við vildum ekki verða einhvers konar stjórnendur yfir verkefninu.“ Sýningin tekur á sig skýrari mynd eftir því sem vikunni vindur fram. 

Þetta er í fyrsta sinn sem listavikan er haldin en ef vel gengur langar þær stöllur að gera hana að árlegum viðburði sem gæti stækkað ár hvert.

„Það er gott að fara á afskekktan stað mörg saman, þá skapast suðupottur af hugmyndum. Og af því að við erum öll saman í einu húsi þá gerast hlutirnir svo hratt,“ bætir Helena við. „Það er svo áhugavert að fatta að hver sem er getur búið til skapandi vettvang fyrir það sem hann langar til að gera.“

Náin samvinna á Hámundarstöðum
Hópurinn dvelst á Hámundarstöðum í Hrísey á meðan á vikunni stendur. Þar verður lifað náið saman næstu vikuna, dagurinn settur saman á morgnana, borðaður morgunmatur og kvöldmatinn elda þau saman. Á hverjum degi á slaginu þrjú verður sameiginlegur húslestur eða sýning af einhverju tagi frá einhverjum í hópnum. Þess á milli vinna þau að sýningunni sem sett verður upp í Salthúsinu um næstu helgi. 

„Öllum er mjög velkomið að taka þátt og kíkja á hvað við erum að gera.“ 

Veðurblíða Listakonunar Helena og Ásgerður Birna skipulögðu vikuna og leikur veðrið við þátttakendur.

.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira