Erlent

Uppvötvuðu nýja tegund ferskvatnshöfrunga

Brjánn Jónasson skrifar
Ný tegund ferskvatnshöfrunga hefur hlotið heitið Inia araguaiaensis, eftir Araguaia-fljótinu þar sem þeir finnast.
Ný tegund ferskvatnshöfrunga hefur hlotið heitið Inia araguaiaensis, eftir Araguaia-fljótinu þar sem þeir finnast. Mynd/Nicole Dutra

Rannsóknir á ferskvatnshöfrungum í Araguaia-fljótinu í Amazon-frumskóginum í Brasilíu hafa leitt í ljós að þeir tilheyra nýrri tegund. Nærri ein öld er liðin frá því ný tegund höfrunga uppgvötvaðist síðast, árið 1918.

Höfrungarnir tilheyra fimmtu tegund fersksvatnshöfrunga sem þekkt er í heiminum, samkvæmt umfjöllun BBC. Þrjár tegundir eru í mikilli útrýmingarhættu.

Talið er að um 1.000 höfrungar af þessari nýju tegund séu til í dag. Lengi var talið að þeir tilheyrðu annarri tegund höfrunga, en rannsóknir á erfðaefni höfrunganna hafa leitt annað í ljós.

Nú er talið að þeir hafi skilist frá annarri tegund ferskvatnshöfrunga sem lifa í fljótum Amazon-frumskógarins fyrir rúmum tveimur milljónum ára. Sú tegund er kennd við frumskóginn, og eru einstaklingar af þeirri tegund kallaðir Amazon-höfrungar, þó latneska heiti þeirra sé Inia geoffrensis.

Hér má sjá dreifingu þriggja tegunda ferskvatnshöfrunga í fljótum Amazon-frumskógarins. Algengastir eru Amazon-höfrungarnir (Inia g. geoffrensis). Araguaia-höfrungarnir lifa í fljótum á bláa svæðinu á kortinu. Mynd/Plos One

„Þeir eru mjög líkir hinum höfrungunum,“ segir Dr. Tomas Hrbek, einn höfunda vísindagreinar þar sem fjallað er um þessa nýju tegund. Greinin birtist í vísindaritinu Plos One

Í greininni segir að rannsaka þurfi betur tenginguna milli þessarar nýju tegundar og Amazon-ferskvatnshöfrungunum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira