Innlent

Ætlar að verja trúarstarf í skólanum sínum

Aðalsteinn Kjartansson skrifar
Inga er skólastjóri í Valsárskóla.
Inga er skólastjóri í Valsárskóla.

Inga Sigrún Atladóttir, skólastjóri Valsárskóla, segist ekki ætla að bregða frá hefðum um trúarstarf í kringum jólahátíðina. Hún segir að litaðar séu allskyns Jesúmyndir á jólum og páskum og að farið sé með nemendur í kirkju.

„Ég bíð alltaf eftir símtalinu þar sem þess er krafist að allar þessar áralöngu hefðir verði lagðar niður. Það er slagur sem ég ætla að vanda mig að vinna,“ segir hún á Facebook-síðu sinni. Mikil umræða sprettur upp árlega í kringum jólin en ekki eru allir sammála um hvort trúarstarf, svosem kirkjuheimsóknir, eigi að vera hluti af skólastarfi.

Í umræðum við færsluna segir hún að allir nemendur skólans séu í þjóðkirkjunni og að hún hafi ekki áhyggjur ef barn komi í skólann sem er annarrar trúar.

Þeir foreldrar sem Inga Sigrún hefur rætt við í dag hafa lýst ánægju sinni með umræðuna, sem þó sé heldur óvægin að mati skólastjórans. „Bara jákvæð viðbrögð. Fólk er ánægt með þetta,“ segir hún í samtali við Vísi. „Það hefur engin neitt við þetta að athuga.“

Samkvæmt Facebook-færslunni er trúarstarf hluti af skólastarfinu allt árið en hún segir að prestur komi í skólann tvisvar í mánuði þar sem hann spjallar við kennarana á kennarastofunni og krakkana á ganginum. Í þessum heimsóknum er presturinn að undirbúa trúarstarf sem hefjist að loknum kennsludeginum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.