Innlent

Óskar upplýsinga um málefni fanga

Samúel Karl Ólason skrifar
Tryggvi Gunnarsson, Umboðsmaður Alþingis, fundaði með Guðmundi Inga Þóroddssyni, formanni Afstöðu, hagsmunasamtökum fanga.
Tryggvi Gunnarsson, Umboðsmaður Alþingis, fundaði með Guðmundi Inga Þóroddssyni, formanni Afstöðu, hagsmunasamtökum fanga. Vísir/GVA

Umboðsmaður Alþingis hefur beðið Innanríkisráðuneytið og Fangelsismálastofnun um svör varðandi tafir á meðferð erinda og kvartana frá föngum. Segir hann að við athuganir sínar á síðustu misserum hafi hann veitt því athygli að í ýmsum þessara mála hafi liðið allnokkur tími frá því að viðkomandi erindi hafi verið sent til Innanríkisráðuneytisins og þar til því hafi verið svarað.

Tryggvi Gunnarsson, Umboðsmaður Alþingis, fundaði með Guðmundi Inga Þóroddssyni, formanni Afstöðu, hagsmunasamtökum fanga, í nóvember. Þar komu fram athugasemdir um að félaginu og föngum þætti ganga hægt að fá svör frá stjórnvöldum varðandi málefni fanga.

Umboðsmaður Alþingis sendi í framhaldi af fundinum bréf til Innanríkisráðuneytisins og Fangelsismálastofnunar. Bréfin má sjá hér á heimasíðu Afstöðu.

Í bréfunum óskar umboðsmaður eftir upplýsingum um ýmis erindi. Þar að auki vill hann upplýsingar um hvort stofnanirnar hafi mótað sér almennar viðmiðanir um afgreiðslu á erindum eða í málum þar sem teknar eru ákvarðanir í málum fanga.

Meðal erinda sem Tryggvi vill upplýsingar um eru erindi þar sem Afstaða óskaði eftir áliti Fangelsismálastofnunar á hugmynd um að dreifa sprautum og nálum frítt af heilbrigðisstarfsfólki fangelsanna til eiturlyfjaneytenda í fangelsum og greiðan aðgang fanga að smokkum.

„Í þessu sambandi hef ég í huga að þarna eiga í hlut frelsissviptir einstaklingar og það kann að hafa veruleg áhrif á hagsmuni þeirra að sem fyrst sé svarað til um og eftir atvikum skorið úr um hver séu réttindi þeirra í samskiptum við fangelsisyfirvöld,“ segir í bréfum umboðsmanns. „Þá verður almennt að gera ráð fyrir að fangar hafi alla jafna ekki sömu tök á að standa í málarekstri hjá stjórnvöldum og fylgja málum sínum eftir og aðrir borgarar.“

Hann óskar eftir svörum fyrir 15. desember.

Guðmundur Ingi segir í pistli á heimasíðu Afstöðu að til þess að tæma kæruleiðir innan stjórnsýslu þurfi fyrst að liggja fyrir niðurstaða forstöðumanns viðkomandi fangelsis, sem sé svo kæranleg til fangelsismálastofnunar. Sú niðurstaða er svo kæranleg til innanríkisráðuneytisins.

„Þetta ferli getur tekið marga mánuði, og allt upp í ár,“ segir Guðmundur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira