Fjórir í haldi vegna Molotov málsins á Akureyri

Fjórir einstaklingar eru í haldi lögreglunnar á Akureyri vegna rannsóknar á árásum á hús fulltrúa sýslumannsins á Akureyri. Tveir menn voru í fyrstu handteknir í miðbæ Akureyrar í gærmorgun vegna málsins. Í gærkveldi voru síðan þrír menn til viðbótar handteknir vegna rannsóknar málsins. Lögregluyfirvöld líta málið gríðarlega alvarlegum augum, að ráðist sé að opinberum starfsmanni með þessum hætti. 

Í tvígang hefur verið sótt að íbúðarhúsi fulltrúa sýslumannsins. Atburðarrásin hófst í fyrinótt með því að grímuklæddur maður, vopnaður hnífi bankaði upp á á heimili fulltrúans og hafði ógnandi tilburði í frammi þegar han kom til dyra, en honum tókst flæma manninn á brott. Nokkru síðar um nóttina sá hann hvar bíll hans stóð í björtu báli fyrir utan húsið og kallaði þá á lögreglu og slökkvilið. 

Mennirnir fjórir hafa allir komið áður við sögu lögreglu og hefur fulltrúi sýslumanns þurft að koma að málum þeim tengdum. Lögreglan lítur svo á að mennirnir hafi ráðist að opinberum starfsmanni og því er þetta litið mjög alvarlegum augum.

Ekki er búið að ákveða hvenær mennirnir sem sitja í gæsluvarðhaldi verða leiddir fyrir dómara og óskað gæsluvarðhalds yfir þeim. Sú ákvörðun mun verða tekin undir kvöld.

Lögreglan á höfuðborgarsvæðinu fer með rannsókn málsins. Lögreglan á Akureyri taldi sig vanhæfa til að fara með rannsóknina vegna náinna tengsla við fulltrúa sýslumanns. Sérsveitarmaður vaktaði hús fulltrúans í nótt vegna óvissu hvort ódæðismenn gengju enn lausir.