Innlent

Efast um að maðurinn hafi farið í ána

Kolbeinn Tumi Daðason skrifar
Hér má sjá kort af því hvar bíllinn fór út í ána og hvar maðurinn svo fannst.
Hér má sjá kort af því hvar bíllinn fór út í ána og hvar maðurinn svo fannst. vísir/loftmyndir

Lögreglan á Selfossi hefur til rannsóknar mál mannsins sem fannst kaldur og hrakinn neðan við flugvöllinn á Selfossi í gærmorgun, föstudag. Talið var að maðurinn hefði farið út í Ölfusá í bíl á ellefta tímanum á fimmtudagskvöld en hann fannst um hálfum sólarhring síðar á fyrrnefndum stað. Samkvæmt heimildum Vísis er efast um að maðurinn hafi farið í ána.

Maðurinn er á 29. aldursári og hefur endurtekið komist í kast við lögin. Hann á að baki langan sakaferil og hefur meðal annars setið inni fyrir þjófnað, fjársvik og fíkniefnabrot. Fulltrúi lögreglunnar á Selfossi vildi ekki tjá sig um málið þegar eftir því var leitað í dag. Vísað var á yfirmenn lögreglunnar sem mæta til vinnu á mánudag.

Frá leitinni.

Kom gangandi til móts við leitarmenn
Lögreglunni barst tilkynning á fimmtudagskvöldið að bíll hefði sést fara út í Ölfusá á milli kirkjunnar og hótelsins á Selfossi. Talið var að einn hefði verið í bílnum og voru lögreglumenn og björgunarsveitarmenn ræstir út. Á níunda tug björgunarsveitarmanna leituðu mannsins langt fram á nótt auk þess sem kafarar með málmleitartæki og áhöfn þyrlu Landhelgisgæslunnar voru kölluð út. Hvorki fannst maður né bíll.

Leit hófst að nýju í birtingu á föstudagsmorgun og um klukkan 10:20 dró til tíðinda. Maður kom gangandi til móts við leitarmenn úr björgunarsveitinni Dagrenningu nærri flugvellinum á Selfossi. Völlurinn er um tveimur til þremur kílómetrum frá hótelinu á Selfossi. Voru þá liðnar tæpar tólf klukkustundir síðan tilkynning barst um að bíll hefði farið út í Ölfusá. 

Áin er afar straumhörð. vísir/gva

„Hann var illa áttaður þegar hann fannst og það verður að bíða betri tíma að fá skýringar frá honum sjálfum. Það litla sem hann hefur sagt okkur er að hann hafi annars vegar verið inni í gámi og hins vegar inni í gröfu,“ sagði Oddur Árnason, yfirlögregluþjónn á Selfossi við Vísi í gærmorgun. Þá sagði hann óljóst hve lengi maðurinn hefði verið í ánni og sömuleiðis óljóst hvar hann hafi komið á land.

Litlar líkur á að bíllinn finnist
Maðurinn var fluttur á Heilbrigðisstofnun Suðurlands og í kjölfarið á Landspítalann í Reykjavík. Víðir Óskarsson, yfirlæknir á bráða- og slysamóttöku HSU, staðfesti við Vísi í gær að líðan mannsins væri eftir atvikum góð. Hann væri ekki í neinni lífshættu.

Bíllinn hefur enn ekki fundist og er ekki fyrirhuguð leit að honum að svo stöddu. Taldar eru litlar líkur á að bifreiðin finnist sökum þess hve straumhart er á svæðinu.


Tengdar fréttir

Leitaði skjóls í vélgröfu

Þorgrímur Óli Sigurðsson, yfirlögregluþjónn á Selfossi, segir það kraftaverki líkast að maður sem fór út í Ölfusá í gærkvöldi hafi fundist á lífi í morgun.

Leit stendur enn yfir í Ölfusá

Leit er hafin á ný að bíl, sem ekið var út í Ölusá á móts við Hótel Selfoss um klukkan hmálf ellefu í gærkvöldi. Hátt í áttatíu manns leituðu án árangurs langt fram á nótt.

Maðurinn fundinn á lífi

Ökumaður bíls sem fór út í Ölfusá í gærkvöldi er fundinn. Maðurinn er á lífi og er kominn til aðhlynningar á sjúkrahúsinu á Selfossi.

Leit hafin á ný í Ölfusá

Hátt í áttatíu manns leituðu án árangurs langt fram á nótt að bíl sem ekið var út í Ölfusá í gærkvöldi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.