Innlent

Stærsti gígurinn í Holuhrauni að ná 70 metra hæð og fer stækkandi

Afar spennandi landslagsmyndun er nú að gerast á Dyngjusandi vegna eldsumbrotanna. Stærstu gosgígarnir rísa sífellt hærra upp úr mikilli sléttu og nýtt lón og foss gætu myndast þegar hraunið girðir fyrir Jökulsá.

Eldgosið kom upp á mikilli sléttu milli Dyngjujökuls og Öskju í svokölluðu Holuhrauni, sem var lítt áberandi í landslaginu og að miklu leyti grafið ofan í sandinn.

Þá eru gömlu Holuhraunsgígarnir nú horfnir inn í stærri og tignarlegri gígaröð, stærsti gígurinn er að ná 70 metra hæð og fer stækkandi, og ljóst að þeir verða áberandi kennileiti í framtíðinni á þessum slóðum, munu gnæfa yfir og standa upp úr flatlendinu.

Ármann Höskuldsson eldfjallafræðingur segir ekki síður spennandi að fylgjast með átökunum milli Jökulsár á Fjöllum og hraunsins og þeirri landslagsmyndun sem þar er í gangi.

Ármann telur hugsanlegt að hraunið nái að girða fyrir Jökulsá og að lón myndist þá fyrir innan.

Eftir því sem hækki í lóninu komi þó að því að áin finni sér leið yfir hraunið og jafnvel nýjan farveg ofan á hrauninu, með fossi. Hún gæti einnig fundið sér farveg í jaðri hraunsins og molað hraunjaðarinn niður.

Allt ræðst þetta þó að því hversu lengi gosið varir og hversu mikið efni það framleiðir

Ármann Höskuldsson líkti jarðeldunum á fyrsta degi við logandi Dreka. Ef sú líking er tekin lengra mætti kannski spyrja hvort hér sé að verða til Drekahraun og Drekaborgir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira