Innlent

Sjáðu samninginn: 5,5 milljónir í leigutekjur til Kópavogs vegna tónleika Justin Timberlake

Kolbeinn Tumi Daðason skrifar
Frá tónleikum Justin Timberlake í Kórnum.
Frá tónleikum Justin Timberlake í Kórnum. Vísir/Andri Marinó

Sena greiddi Kópavogsbæ 8.250.000 krónur fyrir átta daga leigu á íþróttahúsinu Kórnum í Kópavogi þar sem tónleikar Justin Timberlake fóru fram þann 24. ágúst. Þegar gjöld bæjarins hafa verið dregin frá kemur í ljós að nettóleigutekjur bæjarins námu 5.5 milljónum króna. Þetta kemur fram í svari bæjarins við fyrirspurn Vísis.

Bærinn mat það upphaflega sem svo að það samræmdist ekki viðskiptahagsmunum bæjarsins að gefa leiguverðið upp. Kórinn væri í samkeppni við önnur mannvirki á höfuðborgarsvæðinu sem leigð eru út fyrir tónleika af þessum toga.

„Þess má geta að í aðdraganda samningsins um tónleika í Kórnum neituðu samkeppnisaðilar að gefa upp leiguverð þegar eftir var leitað. Í ljósi ásakana um spillingu er metið sem svo að það sé rétt að fórna hugsanlegum viðskiptahagsmunum bæjarins.“

Leiga Kópavogsbæjar á Kórnum hefur verið töluvert til umfjöllunar undanfarna daga eftir að Sigurjón Jónsson, varabæjarfulltrúi í Framsókn, óskaði eftir því að leigan yrði gefin upp. Þá kallaði hann eftir því að upplýst yrði hvaða bæjarfulltrúar hefðu þegið miða á tónleikana. Vísaði hann í siðareglur bæjarins og velti því fyrir sér hvort þær hefðu verið brotnar. Sigurjón hafði ætlað að þiggja boðsmiða á tónleikana en í ljós kom að þeir voru bara ætlaðir bæjarfulltrúum.

Kópavogsbær fékk 30 boðsmiða frá Senu á tónleikana. Taldi Ármann Kr. Ólafsson bæjarstjóri það mikilvægt að bæjarfulltrúar fengju að upplifa tónleikana til að vera betur í stakk búnir til að meta framtíðarmöguleika íþróttahússins. Allir bæjarfulltrúarnir ellefu þáðu miðana en mökum var einnig boðið. Sagði Ármann í kvöldfréttum Stöðvar 2 það eðlilegt enda væri um sunnudagskvöld að ræða.

Hinir miðarnir átta fóru til Páls Magnússonar bæjarritara og Steingríms Haukssonar, sviðsstjóra umhverfissviðs, sem hvor fékk tvo miða. Þá fengu Jón Júlíusson, deildarstjóri íþróttadeildar, Gunnar Guðmundsson íþróttafulltrúi, Valdimar F. Valdimarsson, rekstrarfulltrúi á íþróttadeild og Sævar Sigurðsson sérfræðingur á íþróttadeild sinn miðann hver.

Ármann Kr. Ólafsson bæjarstjóri. Vísir/Anton Brink

Eins og áður segir greiddi Sena 8.25 milljónir króna til Kópavogsbæjar. Fjórar milljónir í leiguverð og 4.25 milljónir í annan kostnað þ.m.t. leiga á gólfi, þrif á gólfi og grasi og flutningar. Þá voru talin með þrif á húsnæðinu. Kópavogsbær greiddi Handknattleiksfélagi Kópavogs 800 þúsund krónur vegna vinnu við tónleikana og Strætó bs. 1.950.000 krónur vegna fólksflutninga. Nettóleigutekjurnar voru því 5.5 milljónir króna.

Í svari Kópavogsbæjar kemur fram að lítil starfsemi sé í Kórnum yfir sumartímann. Þá átta daga sem Sena leigði húsið hafi engin starfsemi verið fyrirhuguð. Miðað við leiguverð í Kórnum og fulla nýtingu á húsnæðinu frá morgni til kvölds væru leigutekjur fyrir dagana átta 3.826.000 krónur. Leigutekjur vegna tónleikanna voru því umfram áætlaðar tekjur af leigu hússins.

Hönnun Kórsins miðast við að 19.000 manns geti verið í honum en flóttaleiðir hússins miða við það. Í samningi Kópavogsbæjar við Senu, sem lesa má í heild sinni hér að neðan, er kveðið á um að hámarksfjöldi gesta á þennan viðburð sé 17.500 og öryggis- og rýmingaráætlanir miðuðu við þann fjölda. Stærð og staðsetning sviðsins takmarkaði fjölda gesta við 17.500 manns.

Í viðhengi hér að neðan má sjá verðskrá Kórsins auk samningsins sem Kópavogsbær gerði við Senu.


Tengd skjöl


Tengdar fréttir

„Frábærar fréttir, ég er klár ásamt maka“

Bæjarstjóri Kópavogs segir hvern og einn bæjarfulltrúa hafa þegið tvo boðsmiða á tónleika Justins Timberlake. Varabæjarfulltrúi Framsóknar, sem telur siðareglur kunna að hafa verið brotnar, fékk enga miða því bæjarfulltrúi flokksins nýtti þá.

Upplýsir ekki um leiguverð vegna Timberlake-tónleika

Ármann Kr. Ólafsson bæjarstjóri Kópavogsbæjar segir að verð sem Sena greiddi fyrir leigu á Kórnum undir tónleika Justin Timberlake sé trúnaðarmál. Auk bæjarfulltrúa fengu makar bæjarfulltrúa boðsmiða á tónleikana en Ármann segir að boðsmiðar fyrir maka hafi verið vegna fjölskyldustefnu Kópavogsbæjar.

Dósirnar komnar í leitirnar

"Það var bara einn starfsmaður hússins sem fór í rölt um nærsvæðið og fann pokana fyrir aftan hurð neðst í hesthúsabyggðinni,“ segir Torfi Jóhannsson, verkefnisstjóri hjá HK, í samtali við Vísi.




Fleiri fréttir

Sjá meira