Fjarlægðu 43 sokka úr maga hunds

Dýralæknar í Portland í Oregonfylki fjarlægðu fjörutíu og þrjá sokka úr maga hunds af tegundinni Stóri Dan í síðasta mánuði. „Við höfum aldrei fjarlægt svona marga sokka úr maga nokkur sjúklings,“ segir dr. Ashley Magee, sem starfar hjá Dove Lewis dýraspítalanum í Portland.

Upp komst um sokkaátið þegar eigendur hundsins tóku eftir því að hann væri að kúgast. Hann var sendur í skoðun og þar sást „mikill fjöldi óþekktra aðskotahluta,“ eins og kemur fram á vefnum Veteriary Practice News.

Hundurinn þurfti að gangast undir skurðaðgerð og voru sokkarnir fjörutíu og þrír fjarlægðir.

Dýralæknarnir sendu röntgenmynd af maga hundsins inn í keppni sem vefurinn Veterinary Practice news hélt. Yfirskrift keppninnar hvar: „Hvað átu þau?“ og voru dýralæknir hvattir til að senda inn myndir af skrýtnum hlutum sem dýr höfðu lagt sér til munns. Myndin endaði í þriðja sæti í keppninni á eftir mynd af skrautsteinum sem froskur át og grilltein sem hundur át.

Dýralæknarnir sem gerðu aðgerðina á hundinum sem át sokkana vonast til þess að hann breyti matarræði sínu. „Hann hefur samt alltaf haft mikla lyst á sokkum,“ segir Ashley Magee um hundinn sem er allur að braggast eftir aðgerðina.

Hér að neðan má sjá sjónvarpsfrétt um málið.