Innlent

Hratt kvikuflæðið á við hálfa Þjórsá

Kristján Már Unnarsson skrifar

Hraunelfan sem streymir úr iðrum Bárðarbungu er að umfangi álíka og flæði hálfrar Þjórsár og hefur þegar myndað 25 kílómetra langan berggang undir Vatnajökli. Engin merki sjást enn um að kvikan sé á leið til yfirborðs en skjálftavirknin er þó áfram öflug. Freysteinn Sigmundsson jarðeðlisfræðingur segir kvikustreymið vera hratt og rétt að menn haldi áfram vöku sinni.

Rauða línan táknar 25 kílómetra berggang sem kvikan er talin hafa myndað milli Bárðarbungu og Kverkfjalla. Grafík/Jarðvísindastofnun HÍ.

Á Jarðvísindastofnun Háskóla Íslands telja menn sig greina að Bárðarbunga sé á síðustu fimm dögum búin að mynda 25 kílómetra langan berggang, sem teygir sig til norðausturs og undir Dyngjujökul. 

„Það streymir kvika undan miðri Bárðarbungu og inn í þennan berggang," segir Freysteinn.

Frá hraunfossi á Fimmvörðuhálsi árið 2010. Hraunelfan frá Bárðarbungu er talin á stærð við hálfa Þjórsá.

Og það er engin smáræðis hraunelfa sem þarna flæðir. Freysteinn segir streymi kvikunnar inn í þennan berggang jafngilda hálfu meðalrennsli Þjórsár eða Ölfusár. Magn kvikunnar geti verið komið upp í 60 til 90 milljónir rúmmetra á þessum fimm dögum sem liðnir eru frá því umbrotin hófust. Þetta er álíka og þriðjungur af því sem kom upp úr Heimaeyjargosinu á fimm mánuðum. 

Engar breytingar hafa til þessa sést á yfirborði jökulsins og engin merki sjást um að kvikan leyti til yfirborðs. Þegar Freysteinn er spurður hvernig hann meti hættuna á gosi á næstu dögum svarar hann að á meðan vísbendingar séu um hratt kvikustreymi undir eldstöðvakerfinu sé eðlilegt að hafa varann á sér. Þessari atburðarás geti þó einnig lokið án eldgoss.

Jarðfræðikort sem ÍSOR birti síðdegis af jarðskjálftahrinunni í Vatnajökli.

Tengdar fréttir

Rýmingu lokið - TF SIF flaug yfir jökulinn

Rýmingu af hálendinu norðan Dyngjujökuls, þar sem Almannavarnir lýstu yfir hættuástandi í gær, lauk upp úr miðnætti, en eitthvað á annað hundrað manns voru á svæðinu í gær. Þar á meðal voru þeir sem dvöldu í skálum í Dreka og í Kverkfjöllum. Lögregla naut aðstoðar björgunarsveitarmanna við verkið og að koma upp skiltum um lokanir á vegum.

Skjálftinn var 4,5 stig

Sérfræðingar Veðurstofunnar hafa endurmetið stærð stóra skjálftans sem varð í Bárðarbungu í nótt.

Brýrnar gætu sópast burt og Dettifoss sorfist niður

Hrinan í Bárðarbungu er mjög öflug og full ástæða til að gera ráð fyrir eldgosi, að mati sérfræðings Veðurstofu Íslands. Viðvörun gagnvart alþjóðaflugi var í dag sett á næstefsta stig.



Fleiri fréttir

Sjá meira