Sport

Gunnar Nelson verður stjarnan í Stokkhólmi

Tómas Þór Þórðarson skrifar
Gunnar Nelson er ósigraður í UFC.
Gunnar Nelson er ósigraður í UFC. vísir/getty

Gunnar Nelson berst í aðalbardagakvöldsins á Fight Night-bardagakvöldi UFC-bardagasambandsins í Stokkhólmi þann 4. október, en þetta getur Vísir staðfest.

Gunnar samþykkti boð UFC í dag um að fara fyrir bardagakvöldinu, en þar mætir hann Bandaríkjamanninum Rick Story í veltivigtarbardaga.

Síðast barðist Gunnar í Dyflinni á Írlandi sem var annar af tveimur aðalbardögum kvöldsins, en nú verður hann stjarnan. Því fylgir mun meiri athygli og auknar tekjur.

Rick Story, andstæðingur Gunnars í Svíþjóð, verður þrítugur síðar mánuðinum, en hann er í 15. sæti veltivigtarinnar á styrkleikalista UFC, þremur sætum fyrir neðan Gunnar.

Hann hefur barist 25 sinnum á ferlinum og unnið 17 sinnum, en árangur hans í UFC eru níu sigrar og sjö töp. Hann barðist síðast við Leonardo Mafra á Fight Night-kvöldi í júlí og vann með uppgjafartaki.

Story er aðeins annar af tveimur mönnum sem hafa unnið Johnny Hendricks, núverandi meistara í veltivigt UFC, en hinn var George St. Pierre, líklega sá besti frá upphafi.

Þetta er mikil viðurkenning fyrir Gunnar Nelson sem heldur áfram að klífa metorðastigann í UFC.

Viðtal við Gunnar birtist á Vísi innan skamms.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira