Innlent

Tveir flugmiðar í fundarlaun

Stefán Ó. Jónsson skrifar
Hunter er svartur border collie með hvítum skellum.
Hunter er svartur border collie með hvítum skellum. MYND/MAST
Bandaríski hundurinn Hunter er nú týndur á Miðnesheiði á Reykjanesskaga eftir að hafa strokið úr búri á Keflavíkurflugvelli á morgun. Hunter er svartur Border Collie með hvítum skellum og eru lögregla, hundafangari og björgunarsveitir að leita að honum dyrum og dyngjum.

Hundinn var verið að flytja yfir Atlantshafið og þegar verið var að taka hann frá borði í morgun og setja yfir í aðra flugvél þá opnaðist búrið og dýrið slapp. Málið er litið mjög alvarlegum augum því strangar reglur gilda um innflutning hunda til Íslands og er tilgangur þeirra að tryggja eins og best verður á kosið að ekki berist til landsins ný smitefni.

Víkurfréttir, sem fluttu fréttir af málinu fyrr í dag, fengu hringingu frá Icelandair þar sem tveir flugmiðar með  Icelandair eru boðnir í fundarlaun þeim sem nær hundinum og kemur honum til réttra aðila.

Matvælastofnun hefur sent frá sér tilkynningu vegna stroksins:

Óhapp varð við flutning á hundi á Keflavíkurflugvelli í morgun með þeim afleiðingum að hann slapp úr flutningsbúrinu. Hundurinn var á leið frá Bandaríkjunum til Svíþjóðar. Leit hófst samstundis en hann er enn ófundinn og stendur leit yfir.

Um er að ræða svartan og hvítan border collie, sem gegnir nafninu Hunter. Eins og flestir vita gilda strangar reglur um innflutning hunda til Íslands, m.a. 28 daga einangrun. Tilgangur þeirra er að tryggja eins og best verður á kosið að ekki berist til landsins ný smitefni. Þessi hundur er bólusettur gegn öllum helstu sjúkdómum en getur borið með sér önnur smitefni og sníkjudýr sem algeng eru erlendis en eru ekki til staðar hér á landi.



Gæludýraeigendur í nágrenni Keflavíkurflugvallar eru beðnir um að gæta þeirra vel á meðan hundurinn er ófundinn og halda hundum sínum hjá sér, ekki sleppa þeim lausum og alls ekki láta þá koma í snertingu við hundinn verði þeir hans varir.

Hver sem kynni að sjá til hundsins er beðinn um að tilkynna það til lögreglunnar á Suðurnesjum án tafar í síma 4201800.




Fleiri fréttir

Sjá meira


×