Innlent

Segir afdrif tillögunar ekki snautleg fyrir sig

Bjarki Ármannsson skrifar
Gunnar Bragi Sveinsson utanríkisráðherra var gestur Sigurjóns M. Egilssonar í Sprengisandi í dag.
Gunnar Bragi Sveinsson utanríkisráðherra var gestur Sigurjóns M. Egilssonar í Sprengisandi í dag. Vísir/Pjetur

Gunnar Bragi Sveinsson utanríkisráðherra segir að auðvitað hefði hann viljað klára þingsályktunartillögu sína um viðræðuslit við Evrópusambandið á þessu þingi. Hún hafi samt sem áður skýrt umræðuna um mögulega aðild Íslands mjög mikið og að afdrif hennar hafi alls ekki verið snautleg fyrir sig.

Þetta kemur fram í viðtali Sigurjóns M. Egilsonar við Gunnar Braga í Sprengisandi í dag. Gunnar segir margt hafa breyst innan Framsóknarflokksins síðan á flokksþingi árið 2009. Þar samþykkti flokkurinn að við aðildarviðræður við Evrópusambandið yrði gerður sáttmáli við Evrópska seðlabankann um að tryggja efnahagsstöðu Íslands þar til evran væri tekin upp.

„Það hefur margt breyst síðan,“ viðurkennir Gunnar. “En við samþykktum einnig á sínum tíma að ef það yrði farið í viðræður þá yrði það gert með ákveðnum skilyrðum. Þau skilyrði voru ekki uppfyllt, við gátum ekki stutt það. Og ég hef oft velt því fyrir mér hvers vegna í ósköpunum menn fóru ekki fyrst og létu reyna á til dæmis sjávarútveg eða landbúnað, fjármagnsflutninga og svo framvegis.” 

Hann segir ekkert í samningaviðræðum Íslands og ESB hafa varið komið lengra á leið en hann hélt þegar hann tók við embætti.

„Það sem kemur á óvart er hversu lítið er búið að gerast,” segir Gunnar. „Það er búið að eyða þessum langa tíma í viðræður, ég ætla að leyfa mér að segja, nánast eingöngu um kafla sem snúa að EES-samningnum og einhverju slíku. Það eru í sjálfu sér ekki búið að fara fram neinar efnislegar samningaviðræður í þessu máli.”

Hann tekur ekki undir það að afdrif þingsályktunartillögu sinnar um að slíta viðræðum við ESB hafi verið snautleg fyrir sig.

„Alls ekki. Það sem tillagan hefur gert er að skýra umræðuna mjög mikið. Auðvitað hefði ég viljað klára tillöguna með einhverjum hætti. Og það er náttúrulega slæmt með stjórnarflokkana, sem eru með 38 þingmenn, að geta ekki klárað stjórnartillögu sem fór í gegnum ríkisstjórn. Það er vitanlega umhugsunarefni, ég skal alveg viðurkenna það.”

Hinsvegar breyti það því ekki að tillagan er í línu við stefnu núverandi ríkisstjórnar.

„Málið var þegar lagt til hliðar og það var í sjálfu sér ekkert eftir nema að segja við Evrópusambandið: Þessi ríkisstjórn lítur svo á að viðræðum sé lokið. Og það að fá samþykki þingsins er í raun ekkert nema formsatriði. “
Hann segir það merkilegt hve litla umfjöllun annar hluti tillögunnar, að styrkja skuli samband Íslands við Evrópusambandið með öðrum leiðum og að viðræður hefjist ekki á ný nema almenningur fái að kjósa um það, hafi fengið.

„Ég er tilbúinn að flytja tillöguna aftur á næsta þingi, eða aðra tillögu, ef að það er samþykkt ríkisstjórnarinnar eða stjórnarflokkanna að gera það.”

Hlusta má á viðtal Sigurjóns við Gunnar Braga hér fyrir ofan.


Tengdar fréttir

ESB slitatillagan þvælist fyrir þinglokum

Stjórnarandstaðan er einhuga um að ekki verði samið um þinglok nema samkomulag takist um afdrif ESB-slitatillögunnar. Þingflokksformaður Framsóknar telur best að málið verði unnið áfram í sumar innan utanríkismálanefndar.

ESB tillagan dormar í utanríkismálanefnd

Tillaga utanríkisráðherra um slit aðildarviðræðna við það að sofna í utanríkismálanefnd. Örlög tillögunnar ráða miklu um hvernig samið verðu um lok þingstarfa.

Fjöldi umsagna berst vegna þingsályktunar Gunnars Braga

Einstaklingar, hagsmunasamtök og félagasamtök hafa sent inn athugasemdir við þingsályktunartillögu utanríkisráðherra um að draga til baka umsókn Íslands að ESB. Minnt er á loforð og krónan sögð gengin sér til húðar.



Fleiri fréttir

Sjá meira