Innlent

Grundfirðingar hvattir til að spara kalda vatnið

Samúel Karl Ólason skrifar
Lækkað hefur í vatnsbóli Grundarfjarðar vegna kulda og dræmrar úrkomu.
Lækkað hefur í vatnsbóli Grundarfjarðar vegna kulda og dræmrar úrkomu. Vísir/Vilhelm

Kaldavatnsskortur er nú í Grundarfirði og eru íbúar hvattir til að fara sparlega með vatnið. Á vef Orkuveitu Reykjavíkur er ástæðan sögð vera lág vatnsstaða í vatnsbóli Grundfirðinga, vegna óvenjulegs tíðarfars.

„Stöðug vöktun er nú á vatnsöfluninni og frekari upplýsingum verður komið til íbúa eftir því sem þær liggja fyrir,“ segir í tilkynningu frá OR. Þá segir að orkuveitan sæki vatn í fjórar borholur við bæinn Grund, en vegna kulda og úrkomuleysis hafi vatnsborðið í holunum lækkað.

Í gær komst svo loft inn á veitukerfið sem varð til þess að vart varð við grugg í vatninu. „Gruggið er ekki hættulegt og vatnið er hæft til neyslu. Starfsfólk Orkuveitunnar hefur meðal annars verið í sambandi við heilbrigðiseftirlit og bæjaryfirvöld vegna málsins.“

„Nú er stöðug vakt á vatnsöfluninni og mun það eftirlit leiða í ljós hvort vatnsbólið er að gefa nægilega vel af sér til að sinna þörfum bæjarbúa og fyrirtækja í bænum. Miðlunartankur er við vatnsbólið og hversu mikið gengur á vatnið í honum í dag veitir upplýsingar um hvort afköst vatnsbólsins eru næg. Á meðan það er ekki alveg ljóst eru íbúar beðnir um að fara sparlega með kalda vatnið. Nánari upplýsingum verður komið til íbúa um leið og þær liggja fyrir, væntanlega í fyrramálið.“



Fleiri fréttir

Sjá meira