Innlent

Tölvan truflar meira en hún hjálpar

Jón Júlíus Karlsson skrifar

„Tölvurnar trufla okkur meira en þær hjálpa.“ Þetta segja nemendur í 10. bekk í Austurbæjarskóla. Menntamálaráðherra ætlar að leita hjálpar hjá tölvuleikjafyrirtækinu CCP til að bæta námsárangur drengja.

Niðurstöður nýrrar PISA rannsóknar reyndust ekki íslenskum grunnskólanemendum hagstæðar. Eins og greint hefur verið frá í vikunni þá standa grunnskólanemar hér á landi mun verr að vígi en grunnskólanemendur í nágrannalöndum í lestri, stærðfræði og náttúrufræði. 30% drengja getur ekki lesið sér til gagns sem verður að teljast mikið áhyggjuefni.

Við hittum í dag þrjá drengi í 10. bekk í Austurbæjarskóla. Þeir segjast allir ágætir námsmenn sem þó gætu bætt sig mikið með því að lesa meira.

„Ég er ekki að lesa nógu mikið og þarf að lesa miklu meira. Það er mikilvægt að lesa mikið þar sem allt nám byggist á lestri. Það er tölvan sem er að trufla og helst tölvuleikir,“ segir Örn Bjarnar Marteinsson, nemandi í 10. bekk Austurbæjarskóla.

Nemendurnir segjast allir eyða drjúgum tíma á kvöldin í tölvuleiki. Það komi niður á heimalærdómi og lestri. Þeir segjast sömuleiðis ekki hafa skýringar á því hvers vegna stúlkum gengur betur í námi. „Kannski eru þær minna í tölvunni,“ segir Tómas Sturluson. Greinilegt er að tölvan skipar stóran sess í lífi drengjanna.

Leitar á náðir CCP
Illugi Gunnarsson mennta- og menningarmálaráðherra sagði fyrr í vikunni að niðurstaða rannsóknarinnar væri mikið áfall fyrir íslenskt menntakerfi. Illugi hefur meðal annars boðað forsvarsmenn tæknifyrirtækisins CCP á sinn fund til að viðra hugmyndir um þróun á námsgögnum sem gætu bætt árangur nemenda í skóla og þá sérstaklega drengja. Ráðherra mun funda með fyrirtækinu innan skamms.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.