Innlent

Egill klipptur út úr Wikileaks-myndinni

Jakob Bjarnar skrifar
Ekkert verður af því að Egill sjáist leika á móti Cumberbatch á hvíta tjaldinu en Birgitta Jóns verður þeim mun meira áberandi en hana leikur Carice van Houten.
Ekkert verður af því að Egill sjáist leika á móti Cumberbatch á hvíta tjaldinu en Birgitta Jóns verður þeim mun meira áberandi en hana leikur Carice van Houten.

Eftir rétta viku verður The Fifth Estate, kvikmyndin sem fjallar um Wikileaks og Julian Assange, frumsýnd hér á landi. Ísland er verulega áberandi í myndinni en því miður hefur atriði Egils Helgasonar, sem lék sjálfan sig, verið klippt út úr myndinni.

Þetta er samkvæmt heimildum Vísis en Sigurður Viktor Chelbat hjá Sambíóunum neitar að tjá sig um þetta atriði sérstaklega. Egill hafði áður látið þess getið að þarna væri um hápunkt ferils hans að ræða en Vísir greindi frá því hvernig atriðinu er lýst í handriti á sínum tíma.

En, þó það hljóti að teljast veruleg vonbrigði fyrir aðdáendur Egils, að hann hafi lent á gólfinu í klippiherberginu, breytir það ekki því að Ísland leikur stórt hlutverk í The Fifth State. „Ég myndi persónulega halda að þetta sé skylduáhorf fyrir Íslendinga. Myndin hefur skýra skýrskotun til Íslands og þá íslenskra stjórnmála,“ segir Sigurður Viktor. Hann bendir á að 3. stærsta hlutverkið sé Birgitta Jónsdóttir sem hollenska leikkonan Carice van Houten leikur. Og ýmsum spurningum sem varpað er upp varðandi Ísland og þá ekki síst hlut og stöðu Birgittu séu mikilvægar og rétt að þeim sé svaraðað: „Var íslenskur þingmaður í innsta hring Wikileaks? Vissi sá þingmaður um fyrirhugaðar uppljóstranir um Kaupþing sem ollu einhverjum mestu milliríkjadeilum sem þjóðin hefur lent í?“ spyr Sigurður Viktor, sem hefur séð myndina: Hver er staða Birgittu í ljósi þess að hún er fulltrúi þjóðarinnar en ekki einhver rannsóknarblaðamaður hjá Wikileaks. Og svo framvegis og svo framvegis. Sigurður Viktor segist sannarlega virða Wikileaks en þetta sé umhugsunarefni og rétt sé að Birgitta og Kristinn Hrafnsson, talsmaður samtakanna, greini frá því hvernig þessu var háttað?

Á miðvikudag verður sérstök forsýning á myndinni en þeim tveimur, sem hér eru nefnd, verður boðið ásamt fleirum sem við sögu koma. Sigurður segist ekki vita hvort þau mæti en vonar það, og að umræður skapist eftir sýningu myndarinnar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.