Eitthvað sem allar konur ættu að eiga

Anna Rún Frímannsdóttir íslensku- og fjölmiðlafræðingur var meira en til í að segja okkur hvaða snyrtivörur hún er með í snyrtibuddunni og getur ekki verið án.

UNA - íslenska dagkremið og næturkremið

Þetta krem er algjör rakabomba fyrir húðina.

Kanebo - Sensai fljótandi litaða dagkremið

Einn besti farði sem ég hef fundið og eru glösin sem ég hef keypt í gegnum tíðina orðin óteljandi.

Kanebo Total Finish – fast púður

Úff, held að púðurdósin mín sé að verða antík þar sem ég er búin að eiga hana ansi lengi en ég kaupi alltaf áfyllingu þegar púðrið klárast. Þetta finnst mér einfaldlega besta púður í heimi enda sérstaklega þétt og mjúkt svo það helst lengi. Það er líka til í mörgum tónum svo allar konur ættu að finna lit við hæfi.

Helena Rubinstein – Lash Queen Mascara

Vá, held ég sé búin að eiga eina fimmtán svona en það er sama hvaða maskara ég kaupi ég enda alltaf á þessum. Hann lengir og þykkir augnhárin án þess að klessa þau. Ég er mjög vandlát á maskara en þessi er í algjöru uppáhaldi, gæti ekki án hans verið.

Augnahárabrettarinn frá Sephora

Að sjálfsögðu má svo ekki gleyma augnhárabrettaranum góða frá Sephora sem var valinn sá besti árið 2012 af samtökum förðunarmeistara, hann gerir kraftaverk fyrir augnhárin - þau brettast alveg ævintýralega upp við notkun hans.

Long Wear Gel eyelinerinn frá Bobby Brown

Þvílíkt flottur og einn sá besti sem ég hef átt. Ég á hann í þremur litum: dökkbrúnum, svörtum og svo í Forest Shimmer Ink litnum sem ég keypti mér nýlega. Finnst hann æði og nota hann dags daglega. Mér finnst alveg einstaklega gott að vinna með hann og svo helst hann á allan daginn sem er mikill kostur.

Bobby Brown – bronskinnaliturinn

Alveg geggjaður og eitthvað sem allar konur ættu að eiga. Hann er marglitur og brjálæðislega sanseraður sem gefur kinnunum og kinnbeinunum flotta og glansandi áferð. Ljósi hlutinn fer efst á kinnbeinin en sá dekkri aðeins undir þau. Mjög flott að nota hann einan og sér á sumrin án þess að vera með farða eða púður. Kinnarnar verða sem sólkysstar - þessi er í miklu uppáhaldi og sá sem ég get síst án verið.

Benecos snyrtivörulínan

Var að uppgötva nýju þýsku lífrænu snyrtivörurnar frá Benecos. Er alveg kolfallin fyrir þeim og sé mig alveg skipta í auknum mæli yfir í lífrænu vörurnar með tíð og tíma enda skiptir miklu máli hvað við setjum framan í okkur. En frá Benecos á ég varalitinn Peach og kinnalitinn Sassy Salmon sem er guðdómlega fallegur á litinn enda nota ég mikið peach litinn á sjálfa mig. Einnig fjárfesti ég í naglalakki frá þeim sem heitir Urban Grey - svakalega flott á litinn. Mæli með að allir kynni sér þessar flottu vörur en þær eru líka á svo viðráðanlegu verði. Finnst ekki verra þegar gæði og gott verð fara saman.

Mineralize skinfinish –lightscapade frá MAC

Þetta er highlight á kinnbeinin frá MAC sem kom í takmörkuðu upplagi á sínum tíma og er ég búin að eiga það í nokkur ár. Það gefur kinnbeinunum ljóssanseraðan og glansandi blæ og gefur manni þetta frísklega glóandi útlit.

Augnskuggar frá MAC

Á augnlokin nota ég dags daglega augnskuggana Yogurt og Quarry frá MAC, þeir smellpassa saman, eru báðir mattir og gefa svolítið náttúrulegt yfirbragð. Stundum bæti ég stardustinu Poudre Irisée frá Make-Up Forever yfir þegar ég vil fá meiri sanseringu á augnlokin og vera aðeins fínni.

Mac-gloss –Pink Lemonade

Þetta gloss varð að fylgja með en það er í sérstaklega miklu uppáhaldi hjá mér. Það er ferskjulitað og hentar vel með náttúrulegri förðun sem og förðun í sterkum jarðarlitum en ég mála augun oftast í þeim tónum. Maður þarf lítið af honum í einu því hann þekur vel og svo er flott að dreifa honum örlítið út fyrir efri vörina til að stækka varirnar aðeins. Hann er líka alveg ótrúlega flottur yfir Peach varalitinn frá Benecos.

Moroccon olía

Síðast en ekki síst verð ég að nefna Moroccan olíuna sem er algjört æði fyrir hárið. Svo skemmir ekki fyrir hvað það er góð lykt af henni en ég set alltaf örlítið af henni í hárið mitt á hverjum morgni.