Innlent

Segir hátt í 170 hafa séð fljúgandi furðuhluti á Íslandi

Magnús Skarphéðinsson, formaður félags áhugamanna um fljúgandi furðuhluti, segir að hann hafi skráð um 170 reynslusögur einstaklinga á Íslandi sem hafa séð fljúgandi furðuhluti. Þar af séu um 30 frásagnir mjög nákvæmar. Þetta kom fram í Síðdegisútvarpinu á Rás 2 þar sem rætt var við Magnús í tilefni af því að heimildarmyndin Sirius var frumsýnd í dag.

Myndin hefur vakið heimsathygli þar sem aðstandendur myndarinnar, hópur bandarískra kvikmyndagerðarmanna, fullyrða að smávaxin geimvera hafi fundist í eyðimörkinni í Síle. Framleiðendur myndarinnar halda því fram að geimveran sé ævaforn og afar smávaxin í þokkabót, eða fimmtán sentímetrar. Í heimildarmyndinni er jafnframt rýnt í erfðaefni verunnar en kvikmyndagerðarmennirnir fullyrða að genamengi hennar eigi ekki hliðstæðu í náttúru jarðarinnar.

Magnús segir í Síðdegisútvarpinu að hann fagni því að vönduð heimildarmynd hafi verið gerð um málefnið og bætir við að það sé í raun undarlegt að menn skuli telja nokkurn vafa á því að það sé líf á öðrum hnöttum þar sem frásagnir um heimsóknir vera frá öðrum plánetu séu milljónir talsins.

Magnús segir að á Íslandi hafi hann tekið saman á milli 160 og 170 frásagnir. Um sannleiksgildi þeirra segir hann að viðtölin séu tekin upp og svo rætt aftur við vitni ári síðar. Þannig sé hægt að sannreyna frásagnir ef smáatriðin stemma í hvert skiptið sem viðtölin eru tekin.

Hann segir raunar helming vitnisburðanna fjalla um ljós á næturhimninum, sem hann telur líklegast fljúgandi furðuhluti. „En svo eru til frásagnir eins og þegar Alda Jónsdóttir og maður hennar sáu á Norðlingabrautinni þrjá silfurlitaða diska koma yfir rauðavatnið, þeir stoppuðu þar í smástund og skutust svo í burtu,“ segir Magnús.

Hægt er að hlusta á viðtalið hér. Stiklu úr heimildarmyndinni má sjá hér fyrir ofan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.